Isnaberong drayber sikopon

CEBU, Philippines – Ang Land Transportation Franchising and Regulatory Board (LTFRB)-7 nipahigayon og Oplan Biyaheng Ayos ug Oplan Isnabero.

Sa maong operasyon niadtong Martes sa gabii diha sa North Reclamation Area usa ka drayber sa taxi ang nasikop tungod kay giingong nibalibad kini og pasakay og pasahero.

Kini ang gitug-an ni Colonel Eduardo Montealto, regional director sa LTFRB-7 nga nahinabi sa Banat News.

Matud ni Montealto nga niadtong Lunes gisugdan nila ang Oplan Biyaheng Ayos ug Oplan Isnabero diin gi-inspection nila ang mga bus nga pasaheroan pagsuta nga dili kini overloading ug sakto usab sila sa ekipo aron worthy ang ilang pagpadagan sa mga sakyanan.

Gibutyag ni Montealto  nga niadtong Martes sa gabii adunay nasikop ang ilang team nga usa ka taxi driver human kini nagdumili sa pagdala sa pasahero sa may north reclamation tungod kay duol ra ang destinasyon niini.

Ang prangkisa nga gihuptan sa mga drayber prebilihiyo lang ug dili rights hinungdan nga kinahanglang dili sila mobalibad sa pagpasakay sa mga pasahero.

Matud usab ni Montealto nga sa unang kalapasan P5 mil ang multa, P10 mil ug 30 ka adlaw nga pagkasuspenso sa ikaduhang kalapasan samtang sa ikatulo nga kalapasan cancellation sa prangkisa.

Si Montealto niawhag sa mga drayber nga dili mamili og pasahero aron dili madakpan tungod kay makabayad sa multa ang ilang mga operator sa mao nilang kalapasan.

Awhag usab ni Montealto sa mga sumasakay nga tan-awon kanunay ang mga pangalan ug plate number sa mga sakyanan nga isnabero ug itaho kini sa ilang buhatan aron ilang mapatubag sa reklamo. (/BDB)(BANAT NEWS)