P1M shabu nasakmit sa pension house
CEBU, Philippines – Mokabat P1 Milyon nga kantidad sa gidudahang shabu ang nasakmit sa kapolisan sa Mambaling Police Station sa gihimo nilang buy bust operation kagahapon sa kaadlawon sa usa ka pension house sa Sitio Lapay, Barangay Punta Princesa , Dakbayan sa Sugbo.
Ang suspek mao si Arnel Bahamonde Adorable alyas “Ankol”,50, nga residente sa Tres de Abril, Barangay Labangon.
Si Adorable nadakpan sud sa usa ka pension house sa Tisa pasado alas 12:00 sa kaadlawon.
Nakuhaan siya og usa ka gamay nga pakete, tulo ka medium nga pakete, ug usa ka dako nga pakete nga gituohang ilegal nga drugas nga motimbang og 157 gramos nga mobalor og 1,067,600.00 ug kwarta nga nagkantidad og P6 mil.
Matud pa nga migawas ang pangalan ni Adorable gikan sa mga nauna nang nangadakpan ug siya maoy gitumbok nga nag-supply kanila og shabu.
“Sa amoa, first time pa namo na siya na nadakpan. Didto sa pension house sa may Tisa during the time pagdakop namo naa siya sa table ug nag repack siya para sa mga mamalitay,” matud pa ni Chief Inspector Randy Tedio Caballes, hepe sa Station 11.
Ang suspetsado natanggong karon sa Mambaling Police Station ug kasohan og paglapas sa Sec. 5 og Sec. 11 art. II of R.A 9165. (Nichole Alexis A. Abas/IBM)
- Latest
