PHO sa Danao gipaubos sa imbestigasyon

CEBU, Philippines – Nipahigayon og fact finding investigation ang Provincial Health Office (PHO) kabahin sa kamatayon sa usa ka bata diha sa Provincial Hospital sa Dakbayan sa Danao nga giingong  wala atimana sa mga medical personnel.

Matud ni Dr. Rene Catan, pangulo sa PHO nga iyaha na lang gipaabot ang detalye gikan sa mga opisyal sa tambalanan kalabot sa maong hitabo.

Si Arlene Reigo nga taga Lungsod sa Carmen ang ni-post sa iyang facebook account ug nangita og hustisiya alang sa iyang pag-umangkon nga si Jame Francis  Gulfan, 3-anyos.

Sa iyang post niadtong Disyembre 3, 2018 gisaysay ni Reigo ang nahitabo sa iyang pag- umangkon sukad nga gihilantan kini niadtong Nobiyembre 25 nga unang gidala sa ginikanan diha sa manghihilot sa pagtuo nga napiang ra ang bata.

Ug tungod kay wala moubos ang hilanat sa bata gidala sa ginikanan diha sa hospital sa ilang Lungsod sa Carmen ug gipaubos sa laboratory diin positibo kini sa dengue ug niadtong higayona 242 ang platelet sa bata.

Ang bata gi-refer sa doktor sa Carmen ngadto sa hospital sa Dakbayan sa Danao apan giingong gibalibaran kini sa maong tambalanan+ tungod kay taas pa ang platelet sa bata ug walay bakante.

Giingong ang bata nagkaubos na ang platelet niini hangtud niabot na lang og 19 ug nihinay na ang pulso sa bata ug nisulirap na ang mata diha pa kini gitabang apan namatay gyud.

Nunot niini, si Dr. Shelbay Blanco, Health Emergency Management Staff Coordinator sa Department of Health nagkanayon nga ang DOH dili makalihok hangtod walay basehanan gawas lang kong adunay balido ug pormal nga reklamo nga isumiter diha sa ilang buhatan ug makig-alayon usab sila sa LGU. - Rowena D. Capistrano/BDB (BANAT NEWS)