Talisay mopatukod og police sub-station

CEBU, Philippines — Kagamhanan sa Dakbayan sa Talisay mopatukod og police sub-station sa sunod tuig diha dapit sa Cebu South Coastal Road (CSCR) aron paspas ang pagresponde sa kapolisan sa mga insidente.

Ang siyudad nigahin na niini og pundo sa pagpatuman sa maong proyekto.

Si Mayor Eduardo Gullas nagkanayon nga nagkadaghan ang populasyon sa dakbayan hinungdan nga nagkinahanglan usab kini og dugang kapolisan nga motubag sa mga alarma.

Sa gihimong deliberasyon sa konseho nisaka ang pundo nga gigahin alang sa kapolisan sa siyudad.

Gikan sa P3 milyones nga pundo karon nisaka kini ngadto sa P6 milyones alang sa sunod tuig.

Si Superintendent Marlu Conag, hepe sa kapolisan sa siyudad mapasalamaton sa gihatag nga suporta sa siyudad ngadto kanila.

Gawas sa sub-station, tumong usab nila nga mabag-o o madugangan ang ilang hand held radio, vest, armas, patrol boat nga gamiton sa pag-roving diha sa kadagatan sa siyudad.

Dugang ni Conag nga kon matuman ang maong proyekto mohangyo usab sila nga mapun-an ang police personnel aron maoy modumala sa sub-station. (/BDB)(BANATNEWS)