Laing evacuation center tukuron sa Madridejos

CEBU, Philippines — Usa ka evacuation center ang itukod sa kagamhanan sa Lalawigan sa Sugbo sa Lungsod sa Madridejos sa Isla sa Bantayan.

Ang Bids and Awards Committee (BAC) sa Kapitolyo nangimbitar na og kontraktor nga maoy mosuplay sa mga materyales lakip na ang pagtukod sa maong evacuation center sa maong lungsod.

Nasayran nga moabot og P6.1 milyones ang gigahin sa Kapitolyo o ang Approve Budget for the Contract (ABC) alang sa itukod unya nga pasilidad. Ang maong evacuation center adunay sukod nga 179.20 metro kwadrado.

Ang BAC mopahigayon og Pre-Bid Conference karong Lunes, Disyembre 3, 2018 nga kabahin sa proseso sa bidding.

Ang Probinsiya sa Sugbo aduna nay nahuman nga natukod ug padayong gitrabaho nga mga evacuation centers sa nagkadaiyang "strategic" nga lugar sa lalawigan nga anaa sa mga kalungsuran sa Sibonga, Boljoon, Medellin ug Pilar sa Isla sa Camotes.

Ang maong mga pasilidad gipabarog sa Kapitolyo aron adunay kabakwitan ang mga residente nga nagpuyo sa mga delikadong lugar atol unya kon adunay mahitabong pagbaha ug pagdahili sa yuta lakip na kadtong mga nagpuyo sa baybayon panahon nga adunay katalagman.

Gituyo kini aron dili na magamit ang mga eskwelahan isip evacuation centers. (/DILT)(BANATNEWS)