Kaohsiung buses i-deploy sa Cebu City South

CEBU, Philippines – Sa tulo ka adlaw nga pagbantay ni Konsehal Dave Tumulak, kinsa maoy chairman sa Committee on Public Order and Safety sa dagan sa trapiko diha sa Natalio Bacalso Avenue, nakita niini nga milambo gyud ang sitwasyon sa trapiko sa dapit sukad giablihan ang northbound ug southbound side roads sa nagpadayong underpass project.

Apan nabantayan ni Tumulak nga adunay daghang pasahero nga dili makasakay og jeep de pasaheroan kay puno na. Kini maoy rason nga mohangyo siya kang Cebu City Mayor Tomas Osmeña nga kon mahimo mo-deploy og tulo ka Kaohsiung buses sa South District sa siyudad gikan sa alas sais hangtod alas nuybe sa buntag.

Tumong niini aron wala’y mga trabahante ingon man mga tinun-an nga ma-late sa ilang trabaho ug klase.

Nasayran nga si Tumulak nakig-istorya kang Mayor Osmeña ug miuyon kini sa plano nga mag-deploy og bus maong karong adlawa dunay mga bus nga makita nga mahimong sakyan sa mga pasahero padulong sa trabaho ug eskwelahan.

Ang Operations Head sa Cebu City Transportation Office Francisco Ouano pabor ra sa maong plano ni Tumulak. - /DILT (BANAT NEWS)