Liboan ka batan-on gilaumang moapil sa Year of the Youth

CEBU, Philippines —  Liboan ka batan-on ang gipaabot karon nga moapil sa ipahigayon nga pagbukas sa Year of the Youth subay sa kalihukan sa Christ the King Sunday ug pagtak-op sa Year of the Clergy and Consecrated Life.

Matud ni Iñaque Garlet, head sa liturgy sa commission on youth atol sa maong kalihukan walay misa nga ipahigayon sa tanang parokya tibuok hapon alang sa paghatag og kahigayonan sa katawhan ug kabatan-onan nga makighiusa sa kalihukan sa Archdiocese of Cebu.

Adunay prayer alang sa Divine Mercy una ipahigayon ang Santos nga Misa ni Archbishop Jose Palma diha sa sulod sa Fuente Osmeña circle ug isunod ang solemn Eucharistic procession padulong sa Cebu Metropolitan Cathedral diin sundan kini sa pagbukas sa year of the youth logo, theme song ug ang mga kalihukan sa umaabot nga National Youth Day 2019 diin ang Archdiocese of Cebu maoy host.

Samtang si Frankel Gerard Margallo, archdiocesan youth coordinator nitug-an nga andam na sila sa dakong kalihukan ug adunay bisita gikan sa Catholic Bishop Conference of the Philippines nga si Padre Conegundo Garganta, executive secretary sa CBCP episcopal commission on youth.

Malaumon si Margallo nga maghugop silang tanang mga batan-on sa maong dakong kalihukan.

Si Palma sa iyang bahin, niawhag sa tanang katawhan nga moapil sa maong kalihukan mag-uwan man o mag-init padayon ang maong kalihukan.

Andam na usab ang kapolisan ug Cebu City Traffic Operations Management (CITOM) ug mga nagkadaiyang ahensiya sa kagamhanan alang sa maong dakong kalihukan sa simbahan.  – BDB, (BANATNEWS)