Bag-ong commander sa CentCom nilingkod na
CEBU, Philippines – Opisyal na nga nilingkod kagahapon sa katungdanan ang bag-ong commander sa Central Command (CentCom) nga si Major General Clement.
Si Clement gradwado sa Philippine Military Academy Sandiwa Class of 1985 ug gikan kini nga nadestino sa 10th Infantry “Agila” Division.
Iyang gihulipan si Lieutenant General Paul Atal kinsa mamahimong Inspector General sa Armed Forces of the Philippines (AFP) headquarters sa Camp Aguinaldo, Quezon City.
Sa Atal kinsa nilingkod sulod sa 11 ka buwan isip commander sa CentCom nakatabang kini sa pagkompiska sa 23 ka high-powered firearms, 60 ka low-powered firearms ug pagdakop sa 28 ka armed communists.
Lakip niini ang pagkompiska sa P198 milyones nga kantidad sa drugas ug P62 milyones nga balor sa marijuana.
Si Atal gradwado sa Philippine Military Academy Maharlika Class of 1984 og giingong moretiro na kini sa katungdanan sa sunod tuig sa edad nga 56. -/BDB (BANAT NEWS)
- Latest
