Assessment sa Inayawan landfill ipresentar

CEBU, Philippines — Ipresentar na sa consultant sa kagamhanan sa Siyudad sa Sugbo ang ilang assessment sa Inayawan landfill.

Matud ni Nida Cabrera, pangulo sa Cebu City Environment and Natural Resources Office (CCENRO), nga ang mga representante sa Full Advantage Philippines, Inc. mopasabot sa ilang assessment report sa technical team sa siyudad karong adlawa.

Gipaabot usab ang ilang mga rekomendasyon alang sa closure ug rehabilitation plan sa landfill.Niadtong Abril gisugdan sa consultancy firm ang assessment sa landfill nga gisirad-an dul-an sa duha ka tuig na ug nahuman kini niadtong Oktubre.

Ang technical team nga gilangkuban sa mga personalidad gikan sa CCENRO, Department of Public Services, City Administrator’s Office, City Budget Office ug uban pa maoy mo-review sa rekomendasyon sa kompaniya.

“It might be naa pa’y comment ang technical team so unya na ni ma-finalize after the meeting with technical team,” si Cabrera niingon.

Human sa pag-review sa output sa consultancy firm, isumiter kini ngadto sa Environmental Management Bureau 7 alang sa ilang mga opinyon. Ang rekomendasyon ipresentar sab sa konseho  alang sa ilang pagtugot.

Kung kini maaprobahan, ang kagamhanan sa siyudad kinahanglan nga motuman sa mga lakang alang sa rehabilitasyon sa landfill.

Sa laing bahin ang Mott MacDonald, usa ka Singapore-based consultancy, ang nag-finalize na sa ilang report aron sa pagpresentar usab niini ngadto sa dakbayan.

Ang Mott MacDonald nag-focus sa pag-ila kung unsa ang haum nga teknolohiya nga mao’y moproseso sa toneladang basura nga nahimutang sa landfill.

Niadtong Enero 2018 nagsugod ang pagtuon sa kahimtang sa landfill diin ang Asian Development Bank (ADB) mao’y naghatag sa budget  niini.

Ang siyudad nagtugot sa duha ka kompanya nga mopahigayon og pagtuon sa landfill aron sa pagsuta sa himoong lakang sa closure ug rehabilitasyon. (BANAT NEWS)