Caretaker gipusil sa sikyu

CEBU, Philippines — Patay ang usa ka 40-anyos nga caretaker og luna human kini gipusil sa gikainom niya nga security guard nga nagbantay sa iyang gitrabahoan sa may Sitio Culis, Barangay Quiot, Dakbayan sa Sugbo.

Gituohan nga naglantugi ang duha kay pulos ubos sa ilimnon nga makahubog.

Ang nakalas naila nga si Ronnie Radizon, 40-anyos, ulitawo, stay-in caretaker ug lumad nga taga Pasig, Kidlawan, Davao del Sur samtang ang suspek nga nasikop mao si Rolando Baja, 40-anyos, taga San Roque, Dakbayan sa Talisay ug security guard sa gibantayan sa biktima.

Ang kapolisan sa Punta Princesa Police Station nakadawat og alarma may kalabutan sa pagpamusil sa maong lugar hinungdan nga dali kini nga girespondehan ug didto naabtan ang biktima nga nahagba na sa yuta ug nabulit sa dugo.

Base sa saksi nga Ritchie Manila, kauban nga security guard sa gitrabahoan sa duha, nga sa wala pa nahitabo ang insidente, nag-inom pa ang biktima ug suspek.

Sumala pa sa saksi nga nakadungog siya og buto tulo ka metros gikan sa nahimutangan sa biktima ug suspek ug sa iyang pagsusi naghigda na si Radizon ug si Baja naghupot sa iyang armas nga maoy gigamit sa pagpusil hinungdan nga iya kining gisikop kauban ang laing mga security guards.

Si Radizon gideklarar nga patay sa Cebu City Medical Services.

Blangko pa ang kapolisan sa motibo sa pagpatay samtang si Baja nagtingkagol na sa prisohan ug gipaabot ang pagsang-at sa tukma nga kaso. (BANAT NEWS)