Atty. Oaminal gitahasan isip anti-drug coordinator

CEBU, Philippines — Gihangop sa  konseho sa Dakbayan sa Sugbo si Atty. Clarence Paul Oaminal kinsa gitahasan isip anti-drug coordinator sa Cebu Province.

Si Konsehal Erik Miguel Espina niduso kini og resolusyon ug giaprobahan sa konseho niadtong Nobiyembre 13, 2018. Si Konsehal Erik Miguel Espina nagkanayon nga garbo kini sa siyudad tungod kay ang Sugbo lang ang gihatagan og anti-drug coordinator ubos sa buhatan ni Senador Vicente Sotto, III.

Si Oaminal adunay igong kasinatian kabahin ang iyang bag-ong tahas diin nahimo kini kaniadtong undersecretary sa Dangerous Drugs Board.

Nadawat ni Oaminal ang order ni Sotto sa niaging semana human nibisita ang senador sa Siyudad sa Sugbo.

Si Oaminal nakadawat kini sa Congressional Plaque of Recognition human siya nitabang sa pagsumpo sa giingong mega shabu lab sa Dakbayan sa Mandaue kaniadto uban nila ni kanhi Kongresista Antonio Cuenco ug Atty. Jose Calida.

Matud ni Espina nga nakatabang si Oaminal sa pagsakmit sa P3.6 bilyones nga kantidad nga ilegal nga drugas kaniadto ug laing 650 kilo nga cocaine sa Eastern Samar.

Nahimong vice chairman sa DDB si Oaminal niadtong tuig 2008 ug acting chairman sa DDB niadtong tuig 2009. Si Oaminal gihulipan isip chairman niadtong tuig 2010 ug nagtuo siya nga tungod kini sa iyang mga operasyon batok sa ilegal nga drugas.

Sa iyang bahin, si Oaminal nagkanayon nga iyang estoryahon ang Probinsiya sa Sugbo aron magmugna og Special Drug Education Center.

Dugang ni Oaminal nga iyang ipa-focus sa mga kabatan-onan ang maong programa ilabi na ang mga walay trabaho ug wala mag-eskwela. (/BDB)(BANATNEWS)