60 batang libudsuroy gihipos

CEBU, Philippines – Moabot sa 60 ka menor de edad nga naglaroy-laroy sa kadalanan ang gihipos sa Cebu City Police Office - Women and Children’s Protection Desk (CCPO-WCPD) sulod lang sa upat ka oras niadtong adlaw nga Huwebes. Apan kutob ra hipos ang ilang mahimo kay way pasilidad nga madad-an kanila. Sigon pa ni  Senior Inspector Arieza Otida, ang tigpamaba sa CCPO nga gisugdan sa WCPD ang pagpang-rescue alas -10 sa gabii niadtong Huwebes hangtud sa alas-2 sa kaadlawon sa adlaw nga Biyernes. Ang kadagahanan giingong gikuha na sa ilang mga ginikanan. Si Otida miingon nga magbalik-balik lang sila sa pagpanghipos sa mga batang libud-suroy tungod kay ang ilang mga ginikanan  anha ra man usab nanginabuhi sa kadalanan.

Miingon si Otida nga hasta ang mga shelter nga mao unta ang modawat sa ilang mga mahipos dili na kapsalig nga maatiman silang tanan tungod sa kadaghan sa mga batang ilaha karong giatiman.

Sigon pa ni Otida, ang mga bata nga naa sa kadalanan ang labing delikado sa kriminalidad nga gitawag nila karong Children’s At Risk (CAR) kay ang uban kanila gamiton pagpalit o pagdagan og illegal nga drugas.

Pwede pud ni sila mamahimong Children In Conflict with the Law (CICL) kung makabuhat na gyud ni sila og bug-at nga mga krimen sama anang pagpatay. Ubos sa Republic Act 9344, manubag gyud sa balaod ang mga ginikanan kung mapatud-an nga wala nila maatiman ilang mga anak.  Apan sigon pa ni Otida dili kini sayon ipatuman tungod kay kon ilang dakpon ang ginikanan wala na say moatiman sa ilang mga anak. “Mao sad kung dakpon nato wala sad magpakaon sa ilang mga anak. Mo end up balik gihapon sa kadalanan. So, ang ato lang gyud is prevention nga dili sila ma take advantage,” sigon pa ni Otida. Nagplano sila karon nga ipaubos sa seminar ang mga ginikanan sa mga batang ilang mahipos sa kadalanan kon unsaon ang hustong pagatiman sa ilang mga anak. Nanawagan si Otida sa mga hingtungdang mga ahensya sa gobiyerno sa pagtukod og wellness centers aron didto madala ug maatiman ingon man magiyahan sa hustong dalan ang mga batang masalbar gikan sa kadalanan.

Si Senior Superintendent Royina Garma sa iyang bahin miingon nga kinahanglang motabang ang mga local government units ani nga problema. Siya nabalaka nga kon dili mabutang sa luwas ug tarong nga kapuy-an kining mga bataa mamahimo silang umaabot nga mga kriminal sa siyudad. Karong adlaw nga Lunes, saulogon sa CCPO ang National Children’s Month ug apil sa ilang mga kalihukan ang pagtabang sa mga batang libudsuroy. (/IBM)(BANAT NEWS)