Mga drayber sa traysikol nabalaka sa e-jeep

CEBU, Philippines – Gibati karon og kabalaka ang mga tricycle driver sa Dakbayan sa Lapu-Lapu nga makahatag unya og dakung epekto sa ilang panginabuhi sa higayon nga mahingpit na gyud ang operasyon  sa mga electronic jeepney.

Si Damaso Ybañez, 47-anyos, nga namasahero sa iyang kaugalingong traysikol sulod na sa 20 ka tuig nga gidugayon, niingon nga posible ang ilang biyahe anha na lang sa mga hilit nga kabarangayan kay anaa na man ang mga electronic jeepney nga magdagan sa mga highway nga molahos ngadto sa Poblacion ug merkado publiko.

Dugang pa niya nga sa pagpanagan na unya sa maong matang sa mga sakyanan, iyang hipanglantawan nga mahimo usab kini nilang kompetensiya sa pagpasakay og pasahero ug mabintahaan sila kay daghan ang mopili sa mga pasahero sa pagsakay sa e-jeepney.

Kini tungod kay gawas nga maayo ang ilang pagkahimutang sa paglingkod, ubos usab ang plite nga P6.50 itandi sa ilang mga traysikol nga P8 ang plite nga ilang gikolekta.

Si Land Transportation Franchising and Regulatory Board 7 Assistant Director Reynaldo Elnar nitug-an nga P6.50 lang ang plitehan sa mga e-jeepney sa matag unang kilometro ug dugang 90 sentabos sa mosunod nga kilometro.

Sa nasayran nga ang e-jeepney maoy matang sa sakyanan nga naggamit og battery nga modagan og 120 ngadto sa 150 ka kilometro ang fully charged battery niini.

Mokarga kini og pasahero sa gidaghanon nga 22 ngadto sa 23 ka tawo ug mobiyahe kini libot sa kabarangayan sa Dakbayan sa Lapu-Lapu nga naglakip sa Poblacion, Pajo, Pusok, Buaya, Ibo, Mactan, Agus, Maribago, Marigondon ug Basak lahos na sa merkado publiko. (/GMR)(BANAT NEWS)