Listahan sa rice importers limpyohan

CEBU, Philippines – Mga pangalan ug address sa tanang rice importers ug rice dealers sa nasud kinahanglang naa sa website sa unom ka ahensya sa gobiyerno nga may kalambigitan sa importasyon sa mga bugas aron dali nga masusi kinsay lehitimo ug kun kinsa ang dili. Ang gipasabot nga mga ahensya mao ang Department of Agriculture, National Food Authorities, Bureau of Plant Industry, Bureau of Customs, Department of Trade and Industry, ug Bureau of Internal Revenue.

Gisugyot kini ni Ilocos Norte Governor Imee Marcos kinsa mokandidato sa pagka-senador sunod tuig kay alang kaniya kining pagbutang lang og buhis imbes nga paghatag og import quotas, dili makapahunong aning rice cartels kay maniobrahon ra nila ang sistema.

Kinahanglang iapil sa websites sa maong mga ahensya ang mga pangalan, address ug uban pang impormasyon mahitungod sa maong negosyante.

Ning bag-o, unom ka tawo ang gipakasohan sa Department of Justice human sa upat ka tuig nga imbestigasyon sa rice smuggling sa nasud. Nakita nga ang sindikato migamit og mga pekeng kooperatiba sa mga mag-uuma ug gani ang ilang lider nga si Davidson Bangayan nigamit og alyas nga pangalan nga David Tan.

Matud ni Marcos, ang mga sakop sa rice cartel pirmeng makalusot tungod sa pagpangalyas pinaagi usab sa pakigkunsabo sa pipila ka mga hiwing opisyal sa gobiyerno.

Iyaha usab giawhag ang katawhan nga motabang sa gobiyerno pagpaniid niining mga nanabotahe sa nasud.