Val Chiong ipakanselar ang COC

CEBU, Philippines — Usa ka petisyon alang sa pagkanselar sa Certificate of Candidacy (COC) ni Valdemar Chiong ang giduso diha sa buhatan sa Commission on Elections (Comelec).

Si Chiong maoy kanhi mayor sa Dakbayan sa Naga ug karon nikandidato sa samang posisyon alang sa sunod tuig nga eleksiyon kinsa ang kasamtangang mayor nga iyang anak nga si Kristine Vanessa Chiong ang mokandidatong bise mayor.

Si Venci Del Mar kinsa nikandidato usab isip bise mayor sa siyudad atbang ni Kristine ang niduso sa maong petisyon niadtong Huwebes.

Sa iyang petisyon si Del Mar nipasangil kang Chiong nga namakak sa iyang COC tungod kay giingong wala gideklara ang giatubang niining kaso sa nilabay’ng tuig nga giduso diha sa buhatan sa Ombudsman.

Gisubay ni Del Mar ang item 22 sa bag-ong COC form sa Comelec diin ang pangutana nagkanayon “have you ever been found liable for an offense which carries with it the accessory penalty of perpetual disqualification to hold public office which has become final and executory?”.

Niadtong tuig 2017, nasuta diha sa Ombudsman nga guilty si Chiong sa kasong grave misconduct and gross neglect of duty.  Ang maong kaso kabahin sa giingong pag-isyu ni Chiong og permit sa Petronas Energy Philippines niadtong tuig 2014 dihang siya pa ang mayor sa siyudad bisan wala pa nakapresentar ang maong kompaniya og fire safety inspection certificate.

Ug giingong ang silot sa maong kalapasan mao nga dili na mamahimong makagunit og posisyon sa gobiyerno si Chiong.

Sa iyang bahin, si Chiong niangkon nga aduna siyay kaso apan giapelar pa kini ug pasabot niini nga dili pa kini final and executory.

“Such case is now on review in the CA (Court of Appeals) for admin and the criminal is with Sandigan, in my own interpretation no finality for now”, pasabot ni Chiong. (/BDB)(BANATNEWS)