Sunog sa Bacayan, P200 mil danyos
CEBU, Philippines – Nikabat sa P200 mil ang danyos sa sunog nga niulbo sa may Sitio Sugarlandia, Barangay Bacayan, Dakbayan sa Sugbo.
Nadawat sa kabomberohan ang alarma sa maong sunog alas 12:54 sa kaadlawon kagahapon ug giisa kini ngadto sa third alarm.
Matud ni Cebu City Fire Marshall, Chief Inspector Noel Nelson Ababon, nga siyam ka panimalay ang hingpit nga naugdaw ug nagsugod kini sa balay ni Artemio Borgonia ug ipaubos pa nila sa imbestigasyon ang hinungdan sa sunog.
Sumala pa ni Ababon nga nakontrolar ang maong sunog ala 1:28 ug hingpit nga na-fire out ala 1:38 sa kaadlawon.
Wala hinooy gikataho nga naangol o nakalas sa maong insidente.
Samtang ang pangulo sa Cebu City Disaster Risk Reduction and Management Office nga si Nagiel Bañacia nitug-an nga siyam ka pamilya o 40 ka indibidwal ang apektado sa maong sunog. (/GMR)(BANAT NEWS)
- Latest
