Ika-upat nga taytayan tukuron
CEBU, Philippines – Sugdan sa Japan International Cooperation Agency (JICA) ang feasibility study alang sa kaugmaran sa ika-upat nga taytayan sa Isla sa Mactan sunod tuig.
Kini ang gibutyag ni Department of Public Works and Highways (DPWH) Undersecretary Emil Sadain.
"We have coordination meeting with JICA representative and DPWH to discuss the feasibility study scheduled on Nov. 21, 2018," matud ni Sadain sa press briefing kagahapon atol sa "Sulong Pilipinas" Economic Forum sa City Sports Club sa Dakbayan sa Sugbo.
Ang nasud sa Japan ang mogasto sa ikaupat nga taytayan nga gibana-banang mokantidad og P3 bilyones o (US$57.69 million).
Matud ni Sadain nga malaumon sila nga ang proyekto mahuman sulod sa administrasyon ni Presidente Rodrigo Duterte.
Sugyot sa JICA nga ang taytayan manukad dapit sa Cansaga, Consolacion padulong sa Pusok, Lapu-Lapu City.
Tumong niini ang pagpaluag sa trapik ilabi na sa Dakbayan sa Mandaue ug Dakbayan sa Lapu-Lapu diin sa kasamtangan aduna nay duha ka taytayan.
Gisugdan na sab ang ikatulong taytayan nga mao ang gitawag og Cebu-Cordova Link Expressway gikan sa Dakbayan sa Sugbo padulong sa Lungsod sa Cordova sa Isla sa Mactan nga gikatakdang mahuman sa 2021. (/GMR)(BANAT NEWS)
- Latest
