Skate park dili na sa SRP tukuron

CEBU, Philippines – Si Konsehal Joel Garganera nga usa sa mga kritiko sa kasamtangang administrasyon ang midayeg kang Cebu City Mayor Tomas Osmeña sa pagbalhin niini sa skate park palayo sa giingong kwestiyonable nga property.

Sa unang plano sa executive department mao nga tukuron ang 4,000 square meter skate park diha sa 26 ektaryang luna sa South Road Properties (SRP) nga napalit sa mga dagkong kompaniya sa  nilabay nga administrasyon.

Apan imbes sa SRP adto na kini giingong tukuron sa A. Pigafetta Street likod nga bahin sa Fort San Pedro diin karong buwan sa Disyembre ipahigayon ang ground breaking.

Gibutyag ni Garganera nga ang lokasiyon diha sa Fort San Pedro accessible kini sa skate boarders.

Ang maong P12 million project naglangkub sa rink nga dunay street course, flat course alang sa beginners, half pipe, bowl, pump track ug mini grand stand.

Si Maria Victoria “Minnie” Osmeña nidonar og P5 milyones alang sa katukuran sa skate park.

Nunot niini, si Garganera nihagit kang Osmeña nga angkonon ang giingong sayop niini sa pagpugong sa developmental permits sa consortium nga nipalit sa 26 ektaryang luna diha sa SRP.

Ang mga dagkong kompaniya gilauman unta nga motukod og word class sports arena ug concert center ingon man business park alang sa mga call center company diha sa SRP nga giingong maghatag og liboan ka trabaho sa mga Sugbuanon.

Apan si Osmeña lig-on sa iyang baruganan nga ang invalid ang pagbaligya sa luna diha sa SRP tungod kay kuwang ang mga dokumento niini. (/BDB)(BANAT NEWS)