‘Utok’ pagpatay sa negosyante nitahan
CEBU, Philippines – Sulod sa duha ka adlaw nasulbad ang kaso sa pagpatay sa usa ka tiguwang nga negosyante nga gisulod sa refrigerator sa Barangay Tabunok, Dakbayan sa Talisay.
Si Supt. Marlu Conag, hepe sa kapolisan sa Siyudad sa Talisay, nihulagway nga sulbad na ang kaso sa pagpatay sa 62-anyos nga negosyante nga si Victoria Lua human ila nang nadakpan ang magsuong suspek sa pagpatay.
Si Johny Duarme, hingkod ang panuigon, maoy katapusang nitahan sa iyang kaugalingon sa Badian Police Station ug gi-turnover sa Talisay City Police Station kagahapon sa hapon.
Si Lua ang gipatay sa ilang panimaye niadtong Nobiyembre 1 apan napalgan niadtong Nobiyembre 3.
Unang nasikop sa mga operatiba mao si Jayr Banilad ug nisunod si Jeffrey Duarme. Ang duha nipasangil ni Johny nga maoy mastermind sa maong pagpatay.
Apan ang naulahi sa dihang nahinabi sa mga tigbalita nitudlo sab sa duha nga maoy responsable sa krimen ug wala siya’y labot.
Gani iyang giingon nga si Jeffrey hagbay ra nga nangawat sa kwarta ug alahas sa ilang amo nga si Lua.
Si Conag nibutyag nga ila pang gisubay kun unsa gyud ang sulod sa gamay nga vault kay kini mao man ang naguba sa mga responsable sa krimen. Ang mga asawa ni Jayr ug Jeffrey gikomprontasi si Johny kun nganong gilambigit ang ilang mga bana. (/GMR)(BANAT NEWS)
- Latest
