Moralidad sa kapolisan palig-unon
CEBU, Philippines — Cebu Provincial Police Office (CPPO) moduso og programa alang sa pagpalig-on sa moralidad sa kapolisan ug alang na usab sa ilang internal cleansing.
Gitawag ni CCPO director Police Senior Supt. Manuel Javier Abrugena ang umaabot nila nga programa nga Squad System diin adunay magmonitor nga squad leader ang matag pito hangtud napulo ka mga personnel sa tibuok Probinsiya sa Sugbo.
Giingong giyahan sila sa og mga pastor ug pari depende sa ilang relihiyon.
"Intended po sa ating police for internal cleansing purposes. May designated na squad leader ang bawat 7 o 10 personnel and may life coach po, pastors o kaya ministers," si Abrugena miingon sa Banat News.
Giingong magpahigayon sila og meeting sa mga squad leader matag semana aron kumustahon ang performance sa kapolisan.
"I want to strengthen the camaraderie of CPPO personnel. I want everybody answerable to each other’s good or bad deeds. Accountability po ang ma-nurture sa bawat police," si Abrugena nagkanayon.
Dugang niini nga angayang pahinumduman sa pulong sa Diyos ang kapolisan sanglit matud pa nga kon ang polis wala nay kahadlokan nga Ginoo, hayan mahisalaag sila.
Dako ang pagtuo ni Abrugena nga mao kini ang kakuwangan sa mga eskalawag nga mga polis.
Karong buwan sa Nobyimbre ilusad ang maong programa.
Giklaro sab sa direktor sa kapolisan sa lalawigan nga dili lang kini alang sa mga personnel sa CPPO headquarters apan lakip na sab ang mga estasyonan sa tibuok Probinsiya sa Sugbo.
Nasayran nga sugod niadtong panahon ni kanhi PNP Chief Ronald 'Bato' Dela Rosa hangtud karon sa pamunuan ni PNP Chief Oscar Albayalde, gihingusgan ang internal cleansing sa kapolisan. (/DILT)(BANATNEWS)
- Latest
