Mga produkto sa Lapu-Lapu ipasundayag

CEBU, Philippines — Mga nag-unang produkto sa 30 ka barangay sa Dakbayan sa Lapu-Lapu ang ipasundayag sa publiko atol sa ipahigayong Pasigarbo Festival karong Nobyimbre 18 niining tuiga.

Ang maong Pasigarbo Festival kabahin kini sa mga kalihokan sa pagsaulog sa tinuig nga pangilin sa Birhen sa Regla nga patrona sa siyudad nga gikatakda sa Nobiyembre 20 hangtod sa 21 sa matag tuig.

Ang 30 ka barangay gilangkuban kini sa 11 ka barangay sa Isla sa Olango ug 19 ka barangay sa mainland.

Ang mga contingent gikan sa kabarangayan sa siyduad nga mosalmot mopasundayag diha sa kadalanan sa nag-una nilang produkto nga nahimong panginabuhian sa mga lumolupyo.

Ang mga produkto naglakip sa pabuto sa diha sa Barangay Babag, poso sa Barangay Gun-ob, pisi nga lanot sa Barangay Basak, sista sa Barangay Pajac ug furniture sa Barangay Mactan.

Gawas sa mga nag-unang produkto, ipasundayag usab ang mga lugar nga nailhan nga bisitahon sa mga langyaw nga turista.

Sa Isla sa Olango ipasundayag ang bird sanctuary sa Barangay San Vicente diin kasagaran kining bisitahon sa mga dumuduong ug langyaw nga mga turista sa tuyo nga makita ang nagkadaiyang matang sa mga langgam nga maglakawlakaw daplin sa hunasan. (BANAT NEWS)