Budget hearing alang sa P8.1bilyon kasado na

CEBU, Philippines — Adunay lima ka adlaw nga budget hearing sunod buwan nga sugdan sa Konseho sa Siyudad sa Sugbo aron tukion ang giduso nga P8.1 billion proposed Annual Budget sunod tuig.

Si Konsehal Margarita Osmeña, kinsa maong pangulo sa committee on budget and finance, mi-eskedyul sa budget hearing karong Nobyimbre 5, 7, 8, 9, ug 12 gikan sa alas nuybe sa buntag hangtud alas singko sa hapon.

Alang sa Nobyimbre 5 nga hearing, giimbitar sa konseho ang opisyales sa Local Finance Committee, Office of the Mayor, special projects ubos sa Office of the Mayor ug tanang opisina ubos sa Office of the Mayor.

Sa petsa siete, mopresentar sa ilang budget ang buhatan sa City Administrator, tanang buhatan ubos sa City Administrator, City Planning and Development, ug General Services (DGS).

Inig Nobiyembre 8, schedule sa Peace and Order program, Cebu City Transportation Office, Cebu City Sports Commission, ug Department of Public Services (DPS).

Pagka sunod adlaw, mopresenta ang Department of Social Welfare and Services, Cebu City Disaster Risk Reduction and Management Office, Local Disaster Risk Reduction and Management Fund, ug City Agriculture Department.

Sa katapusang hearing, Nobyimbre 12, tukion sa konseho ang budget sa Department of Engineering and Public Works, Cebu City Medical Center, Guba Hospital, ug Department of Veterinary Medicine and Fisheries.

Sa giduso nga P8.1 billion alang sa operation sa City Hall sunod tuig, ang DGS ug tanang opisina ubos niini ang adunay dako nga gahin nga moabot og P788.8 million ug gisundan kini sa DPS nga P692.2 million.

Ang labing bag-o nga item sa budget nga moabot sa kapin P200 million mao ang alang sa pagpalit og 40 ka bus nga special project sa mayor alang sa mga college student sa bukirang bahin sa siyudad.

Ubos niini, P6.6 million alang sa sweldo sa mga drayber sa mga bus ug P26.4 million alang sa gasolina. (/DILT)(BANATNEWS)