Pagtrabaho sa CTU extension campus gipahunong sa DENR

CEBU, Philippines — Gipahunong sa Department of Environment and Natural Resources (DENR) sa Rehiyon 7 ang nagpadayon nga building construction sa extension campus sa Cebu Technological University (CTU) nga nahimutang sa Barangay Babag, Dakbayan sa Sugbo.

Si DENR-Region 7 Executive Director Gilbert Gonzales misuwat ngadto sa Department of Public Works and Highways (DPWH)-7 niadtong Mayo 2018 aron ipahibalo nga kinahanglan hunongon una ang proyekto sa CTU kay kini gitukod sulod sa Central Cebu Protected Landscape (CCPL).

Nahibaw-an sa DENR-7 nga ang maong proyekto walay permit gikan kanila human sa gihimo nga ground inspection ug verification.

Ang construction site anaa sulod sa Sitio Maomawan sa Brgy. Babag. Si Jose Cleo Cary Colis, CCPL-Protected Area Superintendent ug DENR-Provincial Environment and Natural Resources Officer sa Cebu, nagkanayon nga ang DPWH-7 giabisohan nga mopasa og mga gikinahanglan nga dokumento una kini makapadayon sa konstruksyon.

Ang maong proyekto kinahanglan pa usab makakuha og endorsement gikan sa CCPL-Protected Area Management Board, nga mao ang policy-making body nga adunay awtoridad sa maong protected landscape.

Si Colis mipadayag nga ang maong proyekto nga nasugdan na, gipahunong og trabaho kay wala kini makakuha og clearance gikan sa board.

Kon makakuha na ang DPWH-7 sa maong resikitos, matod niya nga tugotan ra kini nga makapadayon sa trabaho kay ang maong site nasulod sa usa ka multiple-use zone. (Jean Marvette A. Demecillo/DILT)(BANATNEWS)