CPIPO nangayo og dakong budget

CEBU, Philippines – Ang Cebu-Provincial Investment and Promotion Office (CPIPO) maoy labing dako og porsyento sa pagsaka sa gipangayo nga pundo alang sa tuig 2019.

Sa 30 ka buhatan sa Kapitolyo nga nangayo og dako nga pundo ang nag-una kanila ang CPIPO.

Base sa summary appropriation sa mga buhatan sa Kapitolyo ang CPIPO nangayo kini og P20, 879, 275. 14 nga pundo alang sa sunod tuig, nisaka kini og 157.33% o P12.7 milyones itandi sa kapin P8 milyones nga pundo niining tuiga.

Nagsunod ang Provincial Engineering Office nga niabot  ngadto sa P240.7 milyones ang gipangayo, nisaka og 155.61% itandi sa P94 milyones nga pundo niining tuiga.

Ang ikatulo mao ang Provincial Tourism Office diin gikan sa P10 milyones karong tuiga niabot ngadto sa P21 milyones ang gipangayo nga pundo alang sa sunod tuig.

Si Danilo Rodas, provincial budget officer nagkanayon nga dili pa final ang budget nga gipangayo sa matag opisina sanglit posible pa kini nga kaltasan o patas-an ang gipangayo nga pundo atol sa budget hearing nga ipahigayon sa committee on budget and appropriation sa provincial board.

Atol unya sa budget hearing ang mga miyembrong bokal sa komitiba motuki kini sa gipangayo nga pundo sa matag buhatan lakip na sa mga programa nga gahinan nila sa pundo nga ilang gipangayo ug sa hinungdan sa pagpangayo nila og dakong pundo.

Ang Probinsiya sa Sugbo niduso kini og P4.692 billion nga proposed budget alng sa tuig 2019 diin nisaka kini og 4.23% itandi sa P4.5 bilyones nga pundo karong tuiga. (/BDB)(BANAT NEWS)