COC ni Andales, Arcilla gikwestiyon
CEBU, Philippines – Gikwestiyon ang kandidatura nila ni Konsehal Sisinio Andales ug Alvin Arcilla nga pulos sakop sa Bando Osmeña Pundok Kauswagan.
Usa ka Allen Canoy, taga Barangay Apas, Siyudad sa Sugbo, ang nisang-at og petition sa buhatan sa Commission on Elections sa pagpakanselar sa ilang certificate of candidacy.
Matud ni Canoy nga sila si Andales ug Arcilla nakaserbisyo sa Sangguniang Panlungsod sulod sa tulo ka sagunson nga termino human sila napili niadtong 2010, 2013 ug 2016.
Base sa balaud nga dili na pwede makapapili ang usa ka opisyal sa ika-upat nga higayon.
Apan si Arcilla niingon nga ang BOPK nikonsulta sa mga abogado sa wala pa siya ug si Andales nisang-at sa ilang COC.
Si Andales nagtuo nga ang petisyon ibasura sa Comelec sanglit wala’y basehan nga ikanselar ang iyang COC ingon man kang Arcilla.
Gibasehan ni Andales ang pagkaputol sa ilang termino dihang gisuspenso sila sa Office of the President og unom ka buwan niadtong 2016 uban nilang kanhi mayor Michael Rama ug Bise Mayor Edgardo Labella.
Si Canoy niingon nga ang suspension ni Andales ug Arcilla dili effective interruption sa termino dungan sa pagbutyag nga nagpabilin nila ang ilang titulo apan gidid-an lang sa paghimo sa opisyal nga trabaho. (/GMR)(BANAT NEWS)
- Latest
