Konsehal James Cuenco makabalik sa pwesto

CEBU, Philippines — Nimando ang Court of Appeals nga ibalik isip konsehal sa Siyudad sa Sugbo si James Anthony Cuenco.

Si Cuenco gihulipan ni Konsehal Erik Miguel Espina dihang gitangtang siya sa Ombudsman sa kasong grave misconduct ug serious dishonesty sa paggasto sa pundo sa gobiyerno. Hinoon nalipay si Espina sa kalambuan sa kaso aron malimpyo ang ngalan sa mga Cuenco.

Andam siya manaug sa pwesto kung molingkod na si Cuenco sa katungdanan.

“Ako nalipay lang gyud ko, I repeat myself, I was able to push the conversation towards a Cebu City university and duha ka Cebu City hospital, karon everybody is talking about it, they want to have one when they run,” matud ni Espina.

Bukas ra sab si Espina kung ilisan siya sa partido Barug PDP-Laban isip kandidato sa pagka-konsehal sa umaabot eleksiyon. Si Associate Justice Jhosep Lopez sa Court of Appeals Third Division nibaligtad sa desisyon sa Ombudsman gumikan sa kakuwang sa ebidensiya.

Nimando ang CA sa Department of Interior and Local Government nga ibalik si Cuenco sa posisyon. Subay niini, si Bise Mayor Edgardo Labella nga kaalyado ni Cuenco nibutyag nga sundon nila ang korte ug daan na silang naglaum nga ma-abswelto gyud si Cuenco kay wala kini sala nga nabuhat. Si Cuenco sa iyang bahin nalipay sa desisyon sa korte ug kini nitataw nga nakab-ot gyud niya ang hustisya ug nagpasalamat sab siya sa iyang pamilya ug kaubanan sa Barug PDP-Laban nga wala siya pasagdi. Ang amahan ni Cuenco nga si kanhi kongresista Antonio Cuenco ang usa sa magpapili sa pagka-konsehal.

“We welcome the total exoneration, on the merits, by the Court of Appeals in the filed against James Cuenco. The Cuenco family wishes to thank the good lord for the vindication that we received through his blessings,” matud sa amahan ni James. (BANAT NEWS)