Sakop sa frat, kusinero patay

CEBU, Philippines — Duha ang patay sa managlahi nga pagpamusil sa Dakbayan sa Toledo sulod lamang sa 24-oras.

Unang pagpamusil nahitabo sa may Barangay Das alas 8:30 sa gabii niadtong Sabado diin ang biktima naila nga si Brian Alvior, 26-anyos, ulitawo, walay trabaho ug sakop sa Tau Gamma Phi, samtang ang mamumuno nag-motor ug wala mailhi.

Matud ni Senior Police Officer 1 Bartomiano Gargar, desk officer sa Toledo City Police Station, nga base sa inisyal nga imbestigasyon sa ilang imbestigador nga naglakaw lang sa dalan ang biktima dihang kalit giduol sa nag-motor nga mamumuno dayon pusil sa ulo sa biktima duha ka higayon.

Sumala pa ni Gargar nga human sa pagpamusil, ang mamumuno daling nakasibat.

Wala isalikway sa kapolisan ang posibleng kalambigitan sa pagkasakop niini sa fraternity o kaha may kalabutan sa ilegal nga drugas ang hinungdan sa kamatayon ni Alvior.

Duha ka kabhang sa kalibre .45 ang nakuha sa crime scene.

Ikaduhang pagpamusil nahitabo sa may Sitio Sambag 2, Barangay Sangi kagahapon sa alas 3:30 sa kaadlawon.

Ang nakalas naila nga si Allan Barason, 32-anyos, adunay kapuyo, tigluto sa usa ka restaurant sa Toledo.

Samtang ang suspek naila nga si Jariel Linihan, 25-anyos, residente sa Barangay Ibo sa maong dakbayan.

Sumala pa ni Gargar nga natulog ang biktima kuyog sa kapuyo niini dihang kalit nga nisulod si Linihan agi sa bintana ug didto gibirahan niini ang biktima sa makadaghan nga higayon gamit ang .38 calibre sa armas nga maoy naingnan sa kamatayon ni Barason.

Human sa insidente dali nga nakasibat ang suspek.

Matud ni Gargar nga sa inisyal nga kasayuran nga nakuha sa ilang imbestigador nga selos maoy gitutukan nilang motibo sa pagpatay ni Linihan kang Barason human ang kanhi niini kapuyo nga gibuwagan siya sulod pa lang sa pipila ka buwan ug aduna silay anak ang nahimo na sab karon nga kapuyo sa namatay.

Giingong ang suspek wala pa kadawat sa panagbuwag niya sa iyang kapuyo hinungdan sa paghimo niini sa krimen. (BANAT NEWS)