Fastcraft batok cargo vessel, upat naangol

CEBU, Philippines – Upat ka mga pasahero ang naangol human nagkabangga ang MV FastCat M11 ug cargo container nga MV Ocean United sa  kadagatan sa Lauis Ledge  niadtong Huwebes sa gabii.

Ang mga naangol giila nga sila si Daniel Fuentes, 38, nga nabalian og bukog; Manuel Veloso Jr. 48, nasamdan ug nabun-og; Anacleto Dico Jr., 4, nasamad, ug Cary Angelo Bilga, 28, nga nabukol ang likod nga pasahero sa maong pasaheroan. Ang MV FastCat M11 nibiya sa Sugbo padulong sa Tubigon, Bohol nga adunay 70 ka pasahero ug 12 ka rolling cargoes alas-8 sa gabii apan nahitabo ang aksidente.

“Yung Fastcat is palabas ng South Channel enroute to Tubigon then yung MV Ocean United naman po papasok enroute to Pier 6,” pasabot pa ni Lt.JG Mike Encina, tigpamaba sa PCG- Central Visayas.

Ang MV Ocean United nagpaabot sa torno aron makadunggo sa Pier 6 apan nagkadasmagay sa fastcraft. Ang Fastcat anaa na karon sa Pier 3 samtang sa Talisay City giangkorahe ang MV Ocean United.

Gipadala dayon ang ang Coast Guard Marine Environmental Team ug Coast Guard divers aron pagsusi kon may oil spill apan negatibo kini.

Ang MV Ocean United may gibug-aton nga  4,009 gross tons gidala ni Captain Jose Joel Gulfan samtang ang FastCat M11 may gibug-aton lang nga 698 gross tons.

Ang  Archipelago Philippine Ferries Corporation, operator sa  FastCat Roll-On Roll-Off Ferries nangayo’g pasaylo sa mga pasahero ug sa rolling cargo customers tungod sa aberya. Ilaha na sab giatiman ang mga nangaangol ug misaad nga mohatag sila og hinabang nga pinansyal kanila.

Aduna silay kaugalingong gihimong imbestigasyon ug misaad nga mokooperar sila sa mga hingtungdang ahensya nga mohimo usab og linaing imbestigasyon. (Rowena Capistrano/IBM)

2 langyaw sikop tungod sa cyberporn

Duha ka mga langyaw ang nasikop sa managlahing operasyon batok sa cyberpornography nga gihimo sa mga sakop sa International Justice Mission kauban sa kapulisan sa Sugbo.

Ang unang operasyon nahitabo sa Mango Avenue nga niresulta sa pagkasikop sa 51-anytos nga Amerikanong si Charles Gergleyls pinasikad sa search warrant nga giluwatan sa korte tungod sa pagdudang nalambigit kini sa cyberporn operation.

Ang suspek diha gisikop sa sud sa iyang apartment sa Barangay Zapatera, Cebu City sa mga sakop sa PNP- Women and Children Protection Center-Visayas Field Unit.

Nakuha sa maong operasyon ang usa ka smartphone nga adunay SD card, usa ka iPad Pro, usa ka tablet device, money transfer receipts, condoms ug daghang mga putos sa candy nga giingong ipanghaylo ni Gergley sa mga kabataang babaye.

May mga pornographic materials sama sa mga hulagway ug ug mga videos sa langyaw nga nakighilawas sa mga batang babaye nga gituohang mga Pilipina.

Atol sa follow-up operation sa WCPC-VFU, naluwas ang 16-anyos nga taga Talisay City. Giingong si Gergley kinsa lima ka tuig ng nagpuyo sa Sugbo, ilado na sa sirkulo sa mga nalambigit sa cyberpornography.

Si Atty. John Tanagho, IJM Cebu Field Officer Director nidayeg sa kapulisan sa malampuson niining anti-OSEC operation.

Matud pa ni WCPC Visayas Chief Romeo Perigo usa ka law enforcement agency sa ubang nasud maoy nakahatag og tip kabahin sa modus ni Gergley kinsa nia na magpuyo sa Sugbo hinungdan nga gihimoan nila kini og surveillance.

Si Gergly gipasakaan og kasong paglapas sa RA 7610 may labot sa Cybercrime Prevention Act ug Anti-Child Pornography Act ug uban pa.

Kauban sa maong operasyon ang mga sakop sa SWAT, Anti-Cybercrime Group Region 7 ug mga sakop sa Inter-Agency Council against Trafficking 7.

Ang IJM nisuporta sa kapolisan sa mga operasyong sama niini. Miabot na og 120 ka operasyon ang ilang nahimo nga niresulta sa pagkasikop sa  179 ka mga suspek ug 415 ka mga biktima ang na rescue.  Sa mga dinakpan, 46 niini ang nakonbikto.

Sa ikaduhang operasyon, nasikop ang usa ka British national nga nagdala og 14 anyos nga minor de edad samtang padulong sila motabok sa Dumaguete City agi sa Puerto del Sur Port, Barangay Liloan, Santander.

Ang nadakpan mao si Sebastian Lai Cole, 33, kasamtangang nagpuyo sa Barangay Sangi, sa Lungsod sa Alegria.

Matud pa ni Police Officer 1 Jenifer Bohol, Assistant WCPD sa Santander Police Station, nabantayan sa Tourist Police ug Anti-Trafficking in Person Focal Person nga minor de edad ang kauban niini hinungdan nga gidala sila sa police station.

Didto ang langyaw nangangkon nga nagpakuyog lang kini sa maong minor kay mag-renew kini sa iyang Visa didto sa Dumaguete City ug aron usab kini mogiya sa iyang pagsuroy-suroy sa lugar.

Nasuta nga ang maong bata nagtrabaho sa usa ka hardware store ug ang agalon niini maoy nihatag ug pagtugot sa langyaw nga pakuyogan kini kay managkaila na sila niini.

Ang kapolisan nagimbestigar bahin sa pagkatawo ni Cole kon wala ba kini naapil sa listahan sa mga notadong “child predators” o kadtong mamiktima og mga bata pinaagi sa pornograpiya.

Ang maong minor de edad gikostudiya na sa social workers. (Mae Clydyl L. Avila/IBM)(BANAT NEWS)