Dili hanap ang kalampusan kang Conahap

CEBU, Philippines —  Usa siya ka abogado, apan buot niya nga maila isip maimpluwensya nga tawo nga nakatabang sa mga nanginahanglan. Usa siya ka buhing kamatuoran nga kon maningkamot ang tawo, makab-ot gayud ang kalampusan.

Usa siya ka abogado, apan buot niya nga maila isip maimpluwensya nga tawo nga nakatabang sa mga nanginahanglan. Usa siya ka buhing kamatuoran nga kon maningkamot ang tawo, makab-ot gayud ang kalampusan.

Siya mao ang banggi-itang resource speaker, public servant ug kanhi reporter sa radyo nga si Antonio Conahap, 48 anyos, kinsa nagpuyo karon sa Sto. Niño Subdivision Carreta, Cebu City. Mas nailhan siya sa  kadaghanan isip Coach Tony, kinsa tag-iya sa Brilliant Ideas Training Academy.

Kamanghuran si Tony sa unom ka managsoon. Wala nakahuman sa elementarya iyang mga ginikanan ug gibuhi lang sila pinaagi sa pagpamaligya og kangkong ngadto sa merkado.

Kay kangkongan man ang ilang lugar sa Carreta, kangkong ra sab ang kasagaran nilang sud-an.

"Nipa ra ang atop sa among balay. Dali ra kaayo mabuslot maong igka uwan para di me mangabasa butangan namo og plastic ang moskitero,"asoy pa    niini sa Banat News Tingusbawan.

Aron makatabang sa iyang mga ginikanan, bisan sa linghod pa nga pangidaron, nagtrabaho na siya isip kargador sa pier ug ihatag ang kita ngadto sa iyang inahan.

Nagtungha siya sa Carreta Elementary School diin matod pa niya, kanunay siyang wala'y balon.

"Akoy mobuhat sa assignments sa akong mga classmates, hatagan lang ko nilag pagkaon," niya pa.

"Ang pinakalisod dinha mao ang pagpangita og pagkaon. So kinahanglan ko motrabaho sa pier igkahuman sa klase,"dugang pa niya.

Bisan sa kalisdanan, nitapos gyud siya sa elementarya. Padayon siya sa pagtrabaho isip kargador ug nagtungha sa hayiskul sa Sudlon Agricultural School.

"Alas kuwatro pa lang mata nako kay maglakaw ra ko gikan sa Carreta hangtod sa Sudlon. Igkaabot nako, manguha lang ko'g Mabolo nga prutas para akong kan-on,"asoy pa niya.

Gawas sa pagka kargador sa pier, mangguna sab siya sa nataran sa iyang mga maestra diin hatagan siya og P30 ang adlaw. Wala siya'y bayran sa tunghaan kay scholar man siya sa Rafanan Construction ug Gaisano Foundation. Sa iyang determinasyon, nilampos gyud siya sa hayiskul niadtong 1988.

Nikuha siya og libreng Machine Shop nga kurso sa Technical Education and Skills Development Authority (TESDA) sulod sa unom ka buwan.

Samtang nagtungha, nagminyo siya ngadto ni Elenita. Human nigradwar sa TESDA, nagtrabaho dayon siya sa usa ka machine shop.  Apan wala siya nagdugay didto sanglit gikuha man siya sa usa ka non-government organization isip tig-organisar og labor union. Nagsugod siya sa maong trabaho niadtong 1990.

Gikan sa unang NGO, nagbalhin-balhin siya og nagkalain-laing NGO. Gamay ra gyud matod pa ang sweldo niya ug risgo pa kaayo kini sa ilang kinabuhi. Aron mapun-an iyang income, nagtrabaho siya isip radio reporter sa DYRC ug isip policy maker sa TESDA niadtong 1995.

Ug niadtong 1999, nahugno ang kalibutan ni Tony, sa dihang namatay ang ikaduha niyang anak tungod sa sakit nga dengue.

"Wala ko kapalit og dugo niya kay wala'y kwarta. So mao ni akong turning point. Nagtabang ko sa mga tawo nga modako ilang sweldo, unya ako wala'y motabang nako,"pahungaw pa niya.

Niundang siya sa pagka-aktibista, nipahawa sa DYRC niadtong 2000 ug nibalhin sa DYHP. Kay nakat-on man siya sa pag-reflex sa nagtrabaho pa siya sa NGO, nag-sideline siya sa pagpanghilot.

Nakahinabi siya og usa ka malamposong negosyante nga customer. Gihatagan siya niini og libro nga sinuwat ni Napoleon Hill nga nagpatik sa sekreto aron molampos.

Iya kining gibasa ug gi-apply niya ang nakat-onan sa maong libro.

Nidagan siya pagka konsehal sa Carreta niadtong 2002 ug nahimong numero unong councilor bisan pa man nga independente siya.

"Nidagan ko bisan wala'y kwarta, kay ningon si Napoleon nga 'what the mind of man can conceive and believe it can be true', tinuod gyud nadaog gyud ko," niya pa.

Siya ang Chairman sa Committee on Laws sa ilang barangay. Sa susamang tuig sa iyang pagkadaog, nakaila niya ang usa ka kustomer sa reflex, usa ka negosyante ug  president sa Filipino Cebuano Business Club nga si Rey Calooy.

Nasayran ni Rey ang pait nga kinabuhi ni Tony busa gipatungha niya kini sa University of the Visayas sa kursong Political Science. Nahimo pa siyang president sa Supreme Student Government sa UV ug nag-sideline pag-conduct og trainings ug team building.

Hangtod nga niadtong 2005 kay nigradwar gyud siya sa kolehiyo diin nakadawat siya og leadership ug academic excellence award. Ug ang negosyanteng si Rey ang nagtaud sa iyang medalya.

Human niini, gipatungha na pud siya ni Rey og College of Law sa UV. Sa iyang ka busy, niundang siya sa DYHP isip reporter niadtong 2007. Nagpokos sa pagtuon og abugasiya ug nigradwar niadtong 2009 isip Dean's Awardee. Nikuha siya og bar exam ug nakapasar.

Gitambagan dayon siya ni Rey nga magtukod og negosyo. Ug kay hilig man siya mag-lecture, mao kini matod pa ang angayan niyang inegosyo. Natapos iyang termino pagka konsehal niadtong 2013 ug dinhi na siya nisuway pagtaak sa pagnegosyo.

Niadtong May 28, 2014 gitukod niya ang Brilliant Ideas Training Academy. Sa maong negosyo, moduol siya og nagkalain-laing kompanya ug siya ang magpahigayon og trainings ug seminars. Wala matod pa siya'y gipagawas nga kwarta sa pagtukod niini.

"Kaming mga FILCEB members, dili me motoo og puhonan. Ang amoa kay intellectual ug saliva capital ra gyud,"niya pa.

Una niyang seminar nga gipahigayon kay mao ang Human Resource Management 101.

Pangayo niya kaniadto matag usa P2,500. Ug kon gawas sa Cebu ang seminar, modawat lang siya kaniadto og P35,000 kada usa ka seminar.

Anhi niya nakita ang kwarta. Naghimo siya og website aron makita iyang mga services. Aduna sab siya'y mga trabahante nga motabang kaniya.

Naabot na siya sa nagkalain-laing dapit sa nasud aron magpahigayon og trainings ug seminars. Nahimo sab siyang HR manager sa mga dagkong kompanya dinhi sa Sugbo. Consultant sab siya karon sa 18 ka mga kompanya dinhi sa nasud.

Niadtong Mayo 2016 nakadaog siya og balik isip konsehal sa barangay. Daghan na sab siya ug ang  iyang kompanya nga nadawat nga pasidungog sama sa Best Training Provider Award ug Leadership Award. Nakahimo na sab siya og libro, kauban ang duha ka mga authors.

Tungod sa iyang pagpaningkamot sukad pa kaniadto, nakapalampos gyud siya sa iyang anak sa kolehiyo.

Kon kaniadto, buslot ilang balay, karon nakapatukod na siya og tarong nga balay. Kon kaniadto, mag-organisar siya og rally batok sa usa ka kompanya, karon siya na ang tigpanalipod sa kompanya.

"Walay molampos nga tawo kung wala siya'y burning desire. Kung unsay masulod sa akong huna-huna, ako nang isuwat. Kung unsay naa sa imong huna-huna kay mahitabo,"asoy pa niya.

"Kitang tanan gihatagan sa Ginoo og core gift. Kung unsay naa nimo nga maayong laki kaayo ka, kana maoy inegosyo. Kung unsa'y naa nimo nga makatabang ka sa ubang tawo, buhata na," tambag pa niya.

Pangandoy niya   nga mahimong international speaker ug makainpluwensiya sa minilyon ka mga tawo. Busa tambag niya nga dapat sundon ang mga gawi sa mga malamposon nga mga tawo kini aron molampos sab.

"Una, importante nga maniid ka unsay gibuhat sa mga malamposon nga mga tawo aron mahimo sab kang malamposon. Ikaduha, isulat ang imong mga goals, there is power in writing.