Samsam atbangan ni JVR

CEBU, Philippines —  Hingpit na ang pakig-alyansa ni First District Rep. Gerald Anthony “Samsam” Gullas ngadto kang Davao City Mayor Sara Duterte subay sa iyang pagpangandam pagpapili pagka mayor sa Siyudad sa Talisay.

Ang batan-ong Gullas nangayog pasalamat kang Mayor Duterte pinaagi sa iyang Facebook post niadtong Biyernes.

“Thank you Mayor for finding time to meet Papa Eddie and I in Davao. Looking forward to our alliance and our support for your senatorial slate in the May 2019 elections.” matud pa sa post ni Gullas. Ang maong panagtagbo nila ni Gullas ug Duterte dili na bag-o kay niadtong Enero niining tuiga, si Duterte maoy mikasal ni Samsam ug ni Rhea Aquino.

Mahimong runningmate ni Samsam si incumbent Vice Mayor Alan Bucao. Samtang unom ka incumbent city councilors ubos gihapon sa Alayon ang subling magpapili nga naglakip nilang Socrates Fernandez, Rodi Cabigas, Jojo Bacaltos, Teban Daan, Maning Cabriana, ug Gail Restauro.

Ang asawa ni Bucao nga si kasamtangang Association of Barangay Councils (ABC) President Marietta Bucao, magpapili usab pagka konsehal sa siyudad. Duha ka bag-ong sakop ang napuno sa Alayon  hulip sa mga mahuman unya sa ilang termino. Si konsehal Richard Francis Aznar, pulihan sa iyang amahan nga si Ricky samtang ang asawa ni konsehal Valeriano Ylanan nga si Ofelia maoy buot magpapili. Si Barangay Cansojong councilman Ferdinand Rabaya maoy mokumpleto sa slate sa Alayon.

Gilauman nga karong Oktubre 17, katapusang adlaw sa pagduso og Certificate of Candidacy (COC) magdungan og file ang grupo ni Gullas.

Subay niini, suwayan ni kanhi mayor Johnny V. de los Reyes o mas naila nga JVR ang pag-atbang sa batan-ong Gullas sa pagka mayor sa Dakbayan sa Talisay sa sunod tuig nga piniliay.

Si JVR miingon nga bisan sa iyang pagkapukan , wala siya moundang pagserbisyo sa mga kabus.  Moduso siya sa iyang COC karong Martes, Oktubre 16 uban sa wa niya gitug-an nga grupo.

Si Atty. Gallardo Escobar, Comelec officer sa Talisay mipahibawo nga usa pa lang ang mi-file og COC nga usa ka traysikol drayber.  (/DILT)(BANATNEWS)