Usa sa gipatay didto sa Malubog gilubong na

CEBU, Philippines — Gilubong na kagahapon ang usa sa lima ka mga nakalas sa nahitabong pagpamusil diha sa Barangay Malubog, bukirang barangay sa Dakbayan sa Sugbo  apan hangtud karon wa pa gihapoy natumbok ang kapolisan nga responsable sa ilang kamatayon.

Sa Carreta Catholic Cemetery gihatod sa katapusang higayon ang napatay nga si Carl Cabahug, taga Barangay Lorega ug usa ka kanhi empleyado sa fast food chain. Sigun sa nagbangutang pamilya sa nakalas nga huwaton usa nila nga malubong ang laing upat ka mga biktima aron dungan sila sa paghimo og lakang aron mangayo og hustisya sa ilang kamatayon.

Siyam na ka adlaw sukad nahitabo ang gihulagway nga “summary killings” wala gihapoy natumbok nga motibo ingon man utok sa maong krimen ang kapolisan.

Apan adunay kalamboan sa kaso human nga gipahibalo sa direktor sa Cebu City Police Office nga si Police Senior Supt. Royina Garma nga miluwat na og pinanumpaang affidavit ang usa sa duha ka mga survivors nga si Antonio Belande.

Si Belande mao kadtong habal-habal driver nga gisakyan sa usa sa mga gipatay anang adlawa apan nakaikyas human kini nilayat sa sakyanan ug natagak sa bung-aw. Matud ni Garma way himuong reenactment sa hitabo kay si Belande ra ang mikooperar kanila. Aduna pay laing survivor nga usa ka babaye nga gikustodiya karon sa Commission on Human Rights.

"We cannot reenact the situation kay namatay ang lima. Paano mag-reenact? We will just investigate whatever the accounts of Mr. Belande. Pero kailangan ma-corroborate din sa na-gather na na physical evidences," si Garma miingon.

Tug-an ni Garma nga sukad nga nakagawas na sa tambalanan ang laing survivor nga si Charmaine Puran, wala na gyud nila kini nakaestorya hangtod karon.

"Of course we have to talk to her but we cannot force someone," ang maong direktor miingon.

Si Puran midiretso og dangop sa CHR-7 ug sa mga kaparian sa Dakbayan sa Sugbo.  Si Puran ug Belande sa pakighinabi kanila sa media nianang pagkadiskubre kanila gikan sa bung-aw parehong nagduda nga mga polis o militar ang mga kriminal.

Apan gihimakak kini sa director sa Police Regional Office -7 nga si Chief Supt. Debold Sinas ug mipasangil sa media nga maoy nagmaniobra sa mga pangutana aron mapasanginlan ang polis.

Ang mga namatay giila nga sila si Cabahug, Lester Abella, Diover Van Sanjorjo, Christopher Tangag, ug si Orlando Taylor. Nadeskubrehan sab ang usa ka bultong shabu sulod sa usa ka van nga natusak-tusak sa bala tapad sa duha ka motorsiklo. (/IBM)(BANATNEWS)