Sindikato naglihok sa may Sinsin

CEBU, Philippines – Nagtuo si Sinsin, Cebu City Barangay Kapitan Aurelio Lapoña nga sindikato maoy nagpaluyo sa pagpusil patay sa iyang tanod nga si Roger Labajo sa Lagtang, Dakbayan sa Talisay.

Nagkanayon ang kapitan nga ang Sinsin, bukirang barangay sa Dakbayan sa Sugbo, utlanan sa Dakbayan sa Talisay, Toledo ug Lungsod sa Minglanilla ug giingong dunay sindikato sa maong dapit.

Sigun sa kapitan nga wala’y kalambigitan sa ilegal nga kalihukan ang maong tanod.

Nagduda kini nga maong gipatay si Labajo kay gawas nga tanod, basin may nahibaw-an o nakit-an nga mga ilegal nga transaksiyon.

Giangkon ni Lapoña nga nabalaka siya sa sitwasyon sa iyang barangay ug naghangyo na siya kang Mayor Tomas Osmeña nga pabutangan og detachment ang Sinsin aron mabantayan ang mga mosulod ug gawas sa dapit.

Samtang nagkanayon ang tigpamaba sa Police Regional Office-7, Supt. Reyman Tolentin, nga walay kalabutan sa politika ang unom ka gipamatay sa Metro Cebu sulod lang sa upat ka adlaw.

Aron maminusan ang mga insidente sa pagpamusil, nagpakatap ang PRO-7 og pwersa subay sa pagsang-at sa red alert status nunot sa pagsang-at na sa certificate of candidacy sugod karong adlawa.

Sugod karong adlawa mag-monitor ang PRO-7 sa mga magpapili sa eleksiyon sunod tuig aron masuta kun aduna bay “intense political rivalry” sa ilang lugar aron matun-an kun angayan ba kining ideklarar nga election hotspot area.

Sa laing bahin, naglisud gyud ang mga bag-ong polis nga gidestino sa Dakbayan sa Talisay sa pipila ka adlaw nga pagtubag sa mga alarma.

Kini maoy naobserbaran ni Engr. Almond Keith Dela Peña, pangulo sa Engineering Division sa City of Talisay-Traffic Operation Development Authority (CT-TODA).

Asoy pa niya nga matag alarma sa disgrasya sa karsada, mataud-tauran gyud nga maabot ang mga polis nga mo-imbestigar sanglit magkasaag-saag man.

Si Dela Peña nihangyo nga anha na sab mag-opisina sa traffic police sa Barangay Tabunok aron matag alarma nga madawat iyang magiyahan ang kapolisan. Gitunga na ang CT-TODA karon nga gipangulohan gihapon ni Dela Peña sa Engineering Division samtang si Rogelio Villaver mao ang pangulo sa operasyon aron matabangan ang unsa man ang nakuwang sa ilang buhatan. (Camille L. Pateres ug Gabriel C. Bonjoc/GMR)(BANAT NEWS)