Organisado ang namusil sa Malubog

CEBU, Philippines – Usa ka organisadong grupo sa mga durugista ang gidudahan sa Police Regional Office-7 nga luyo sa pagpamusil sa lima ka tawo sa Malubog, bukirang barangay sa Dakbayan sa Sugbo diin duha ang nakalingkawas.

Kini gibase ni Chief Supt. Debold Sinas, direktor sa Police Regional Office 7, sa background sa usa sa mga survivors nga si Charmaine Puran kinsa unang niangkon nga usa siya ka drug courier ug tiggamitan og drugas.

Gipasabot ni Sinas nga grabe ka hugaw ang duwa sa ilegal nga drugas diin yano ra nga makapapatay pinaagi sa ilang mga hitman ang mga distributor sa drugas sa kadtong mga wala namayad.

“Di man ka basta-basta makabuhat og ingon ato kung di ka organized. We are looking into that angle sa Malubog,” si Sinas nagkanayon. Padayag niini nga gisubay sab nila karon kun asa nga drug group nalambigit si Puran nga giingong posibleng maoy utok sa maong krimen.

Matud ni Sinas nga bisan pa man og wala nisaad si Antonio Belande, ang ikaduhang survivor, nga moluwat og affidavit, buot niining makig-alayon sa kapolisan sa maong imbestigasyon.

Dili na mangayo og dugang pamahayag ang kapolisan kang Puran kinsa anaa karon ubos sa proteksyon sa Commission on Human Rights ug sa Simbahang Katoliko.

Unang giasoy ni Puran ngadto sa media nga niadtong Oktuber 3 sa kaadlawon kauban sa iyang higala nga gihinganlan og Jovelle ilang gikontrata ang duha ka habal-habal driver nga silang Belande ug Christopher Tangag.

Paingon sila sa usa ka apartment sa Banawa aron ihatud ang drugas sa ilang katransaksyon apan giingong gigapos ug gitaptapan ang ilang mga mata sa mga lalaki nga iyang gidudahang mga polis ug gipasakay og sakyanan. Sa pagboto-boto na, nakalingkawas silang Belande ug Puran human nangambak sa bung-aw sa maong bukirang barangay. (/GMR)(BANAT NEWS)