Kaso batok ni Capt. Tabal gibasura sa korte
CEBU, Philippines – Gibasura ni Municipal Trial Court in Cities (MTCC) Judge Monalila Tecson sa Branch 1 ang kasong gipasaka sa Siyudad sa Sugbo batok kang Tagba-o incumbent Barangay Captain Ana Tabal.
Niadtong tuig 2017 sila si Tabal; Rosalita Callino, kanhi kapitan sa Buot-Taop; kanhi kapitan sa Sambag 1, Lemar Alcover; Konsehal Joel Garganera kinsa kanhi kapitan sa Tinago; Yolandito Cagang kanhi kapitan sa Basak Pardo; Tisa Barangay Captain Philip Zafra ug kanhi kapitan sa Apas nga si Ramil Ayuman kinsa konsehal karon sa barangay ang gipasakaan og kasong kalapasan sa Article 221 sa Revised Penal Code kon “failure to make delivery of public funds or property” sa siyudad.
Ang maong reklamo kalabutan sa giingong pagdumili sa mga barangay kapitan pagtuman sa May 2016 memorandum ni Konsehal Margarita Osmeña kinsa nahimong acting mayor niadtong higayona nga nagmando sa tanang mga barangay kapitan nga iuli ang ilang city-issued vehicles sa siyudad.
Apan ang maong reklamo batok kang Tabal gibasura sa korte tungod sa kakuwang sa mga ebidensiya. Nunot niini, si Bise Mayor Edgardo Labella mikonsiderar sa maong hitabo nga usa ka maayong kalamboan.
Matud ni Labella nga walay basehan ang gipasaka nga reklamo ni Osmeña ug si Tabal giingong wala kini malisyoso nga intensiyon sa wala pagtuman sa maong memorandum. Dugang ni Labella nga si Tabal nipadala pa kini og suwat nga nag-esplikar nga ang maong sakyanan gigamit sa importanteng tumong. (/BDB)(BANAT NEWS)
- Latest















