Bus transport alang sa call center agents ilusad

CEBU, Philippines – Ilusad sa kagamhanan sa Dakbayan sa Sugbo karong buwana ang Bus Transport nga libreng mopasakay sa mga call center agent paingon sa ilang trabahoan.

Ang maong proyekto usa sa aksiyon nga gihimo sa siyudad human nga usa ka call center agent ang gitulis ug gipatay sa mga tulisan diha sa Barangay Mabolo, Dakbayan sa Sugbo samtang nag-atang kini og kasakyan padulong sa iyang trabaho.

Si Nanette Garong, Cebu City Government Consultant on BPO nibutyag nga gitrabaho na nila ang parking space diha sa Salinas Drive diin anha magtapok ang mga call center agent aron kuhaon ug ihatod sa ilang gitrabahoan.

Ang mga call center agent hatagan usab og lugar diha sa parking space aron anha nila i-parking ang ilang mga sakyanan diin diha sa maong lugar usab sila kuhaon sa bus nga mo-shuttle kanila paingon diha sa sulod sa IT    Park.

Matud ni Garong nga tukion pa nila kong ang mga call center agent pabayaron ba sa ilang pag-parking sa ilang mga sakyanan diha sa lugar.

Dili lang sa IT Park nga mga BPO Companies ang gitan-aw sa siyudad apan lakip usab ang mga BPO companies diha sa JY Square, Cebu Business Park ug Panagdait.

Nangita usab sila og paagi nga kadtong mga graveyard shift nga call center agents makuha sa dapit diin sila nagpuyo. (/BDB)(BANAT NEWS)