Tulo ka menor naluwas

CEBU, Philippines — Upat ka mga babaye, tulo niini mga minor nga taga Dumaguete City ang giluwas gikan sa usa ka babayeng gidudahan sa kapolisan nga human trafficker diha sa Puerto del Sur Port sa Barangay Liloan, Santander.

Padulong na mobalik sa Dumaguete City niadtong Domingo sa kaadlawon ang grupo sa dihang nabantayan ang mga minor nga namakak sa ilang mga edad sa manipesto.

Tungod niini, nitawag ang maong focal person og polis ug gipugngan sila nga makasakay.

Matud pa ni Senior Police Officer 4 Fermo Gallarde, Deputy Chief of Police sa Santander Police Station usa ka Kristine Dayday, 23, nga nagtrabaho sa usa ka  dive shop sa Santander apan taga Daan Taytayan, Calindagan, Dumaguete City ang nagdala sa mga babaye.

Gituohang naabot sila sa Sugbo niadtong Sabado ug gidala sa usa sa mga resorts sa lungsod. Wala hinuon maestablisar sa kapolisan kon unsay gihimo sa grupo sa maong lungsod.

Kasong Qualified Human Trafficking ug RA 7610 (Child Abuse) ang atubangon ni Dayday, samtang ang mga babaye  gikustodiya na sa DSWD.

Matud pa ni Gallarde, usa sa mga inahan mibutyag nga wala kini masayod nga naabot sa Sugbo ang iyang anak. (BANAT NEWS)