Viewing deck sa Butuanon River sugdan na

CEBU, Philippines – Hingpit na nga gipahigayon ang groundbreaking sa viewing deck sa Butuanon River nga gipangulohan ni Mandaue City Mayor Gabriel Luis Quisumbing uban ni Bise Mayor Carlo Fortuna, mga department heads ug pipila ka barangay kapitan.

Quisumbing niingon nga ang viewing deck maoy kabahin sa giplano sa kagamhanan nga pag-ugmad alang sa pagpahiuli sa kahimtang sa Butuanon River sanglit magsilbi man kining showcase sa gikatakda nga 4th International River Summit sunod buwan.

Matud ni Quisumbing  nga ang viewing deck nga gibanabanang nagkantidad og P2 milyones ang gastohan sa pribado nga mga kompaniya nga naglakip sa Vicsal Foundation ug Matimco.

Gitataw sa mayor nga ang maong proyekto ang magsilbi usab nga pagpahigmata sa publiko labot sa kamahinungdanon sa kalimpyo sa magdagayday nga tubig sa Butuanon River nga nagagikan sa kabukiran tadlas sa kabarangayan sa dakbayan paingon sa Mactan Channel.

Ang kagamhanan sa dakbayan ang naggahin na og P32 milyones niining tuiga alang sa rehabilitation sa pipila ka bahin sa Butuanon River isip kabahin usab sa pagpangandam sa 4th International River Summit karong Nobiyembre. Nagsilbi usab nga pilot area ang 1.6-km. stretch sa  Butuanon Bridge paingon sa Cambogaong Bridge sa mga utlanan sa Barangay Umapad ug Paknaan pinaagi sa rehabilitation ug ingon man ang clearing, dredging ug riprapping nga pagahimoon. (/GMR)(BANAT NEWS)