Pagdonar sa balili lot tukion sa Provincial Board

CEBU, Philippines – Gikatakda nga tukion sa Provincial Board sa Sugbo atol sa regular session karong Lunes ang paghatag sa Kapitolyo sa pipila ka parsela sa Balili property ngadto sa kagamhanan sa Dakbayan sa Naga.

Si Gobernador Hilario Davide III nagkanayon nga naduso na niya ngadto sa PB ang draft sa deed of donation alang sa pagdonar sa Kapitolyo sa 2.1 ka ektarya nga bahin sa Balili property. Kini aron magamit isip relocation site sa dili momenus 350 ka pamilya nga apektado sa nahitabong halapad nga pagdahili sa yuta sa Barangay Tinaan, Dakbayan sa Naga.

Sa agenda sa PB sa regular session karong Lunes, nalakip na ang proposed resolution nga paghatag og pagtugot kang Davide nga mopirma sa deed of donation pabor sa Dakbayan sa Naga.

Si Davide nisaad ngadto sa mga pamilya nga ibalhin sa maong luna nga luwas ra ang maong dapit base sa assessment sa Mines and Geosciences Bureau (MGB) ug sa Department of Environment and Natural Resources (DENR). (/GMR)(BANAT NEWS)