Mamuhatay og dinamita sikop
CEBU, Philippines — Upat nasikop kinsa nasakmitan og pipila ka sagol ug gamit sa paghimo og dinamita atol sa pagsilbi og search warrant sa Sitio Mambacayao Diot, Lipayran, Lungsod sa Bantayan alas singko kagahapon sa buntag.
Ang subject sa warrant giila sa Bantayan Police Station nga si Edwin Lopez samtang giapil og dakop ang tulo niya ka kaubanan nga sila si Renato Fernandez Casipong, Bartolomeo Fernandez Casipong ug Emelio Sabolo Golisao.
Nakuha ang unom ka dagkung container sa gituohang ammonium nitrate, 249 ka botelya sa dynamite explosives, gatosan ka blasting caps ug detonating cords.
Nakuhaan sab ang grupo og mga armas nga naglakip sa KG9, usa ka kalibre .45, usa ka kalibre .38 ug usa ka kalibre .22.
Subay sa gipahigayong One Time Big Time Operation sa tibuok probinsiya ug Metro Cebu ang pagsilbi sa maong warrant.
Si Senior Supt. Manuel Javier Abrugena, direktor sa Cebu Police Provincial Office, nibutyag nga nakadawat sila og intelligence report nga gihimong negosyo nilang Lopez ang maong mga dinamita alang sa mga mananagat.
Giingong daghan na nga mga residente ang nireklamo batok sa maong grupo.
“Allegedly nagpapakilala siya na covered by local leaders siya kaya di siya madadakip,” matud ni Abrugena sa Banat News.
Nunot sa pagkadakop sa maong grupo ug pagkasakmit sa maong mga dinamita, matud ni Abrugena nga hayan maundang na ang dynamite fishing sa maong lugar ug sa mga silingang mga lungsod. (BANAT NEWS)
- Latest
