Traysikol sa Talisay nangayo og usbaw sa plitehan
CEBU, Philippines – Nangayo og P4 nga umento sa plitehan ang mga tricycle drivers sa Siyudad sa Talisay.
Si Melflor Boy Bihag, taga Barangay Pooc ug presidente sa Federation of Talisay City Tricycle Operators and Drivers Association (FETEACTODA), niingon nga naapektuhan gyud sila sa pagtaas sa presyo sa gasolina ingon man sa mga palaliton.
Matud niya nga ang P8 nga kasamtangang plitehan niadto pa kini sa tuig 2010.
Asoy pa ni Bihag nga dili na matabang ang kamahal sa mga palaliton ilabi na ang gasolina hinungdan nga nangayo sila og pakitabang sa konseho sa siyudad ingon man ni Mayor Eduardo Gullas aron mapahigayon dayon ang public hearing.
Sa pagkakaron aduna sila’y miyembro nga aduna’y prangkisa nga 1,862 samtang 3,000 niini ang wala’y prangkisa.
Ang usa ka tricycle driver mag-abang og traysikol nga moabot sa P200 ang adlaw apan kun 24 oras P300 ang abangan niini.
Si Bihag nibutyag nga hangyo lang gyud kining ila sa mga opisyal aron sab sila malugak-lugakan.
Apan kun wala man gani aksyon nga ilang makita, hayan mohimo sab sila og lakang nga sila matagad na gyud kay hapit na sab ang piniliay sunod tuig. (/GMR)(BANAT NEWS)
- Latest
