Konsehal Gica gikiha sa Ombudsman

CEBU, Philippines — Gipasakaan sa buhatan sa Ombudsman-Visayas og upat ka kasong kriminal ug administratiba si Konsehal Erwin Gica sa wala pagsang-at sa iyang Statement of Assets, Liabilities and Net worth (SALN).

Si Field Investigation Bureau acting Director Alfred Vann Oguis niingon nga ang fact-finding investigation sa kaso natapos na.

Ang imbestigador sa kaso nga maoy nibarug isip nominal complainant ang nisang-at sa duha ka kalapasan sa Section 7 sa Republic Act No. 3019, o ang Anti-Graft and Corrupt Practices Act; duha ka kalapasan sa Section 8 sa R.A. No. 6713, o ang Code of Conduct and Ethical Standards for Public Officials and Employees; ug kasong administratiba sa grave misconduct and neglect of duty.

Matud ni Oguis nga ang kaso ipaubos sa administrative adjudication diin si Gica hatagan og higayon nga madungog ang iyang habig ug makapresentar sa iyang mga ebidensiya.

Sa niaging tuig ang Ombudsman base sa ilang records niingon nga ang magsuong Dumanjug Mayor Efren Guntrano Gica ug Konsehal Gica wala nakaduso sa ilang SALN.

Kini human si kanhi mayor Nelson Gamaliel Garcia nangayo og kopya sa SALN sa mga Gica sa tuig 2013.

Si Efren nahimong bise mayor gikan sa 2013 hangtud 2016 samtang si Erwin konsehal gikan sa 2013 hangtud karon.

Niadtong Septiyembre 7, 2017, si Sarah Jo Vergara, officer-in-charge sa Central Records Management Office sa Ombudsman-Visayas, niingon nga ang “as per files of scanned SALNs, no available SALN on file, none found” for Mayor Gica for 2013, 2014, 2015, and 2016.”

Kang Konsehal Gica, si Vergara niingon nga “as per files of scanned SALNs, we only found 2013 SALN.”

Kini ang nakaaghat kang Garcia sa pagpasaka og reklamo batok sa magsuong Gica.

Apan gihimakak ni mayor ang pasangil samtang dili makontak si Erwin ingon man ang ilang amahan mga maoy ilang abogado nga si Atty. Edgar Gica alang sa ilang tubag. (BANAT NEWS)