Kapitolyo mogahin og P46.31B alang sa Trans-axial

CEBU, Philippines – Ang kagamhanan sa Probinsiya sa Sugbo gikatakdang mogahin og P46.31 bilyones alang sa implementasyon sa Cebu Trans-axial Development Project sa Metro Cebu.

Lakip sa maong kantidad nga magasto sa Trans-axial highway mao ang P1.58 bilyones nga alang sa lot acquisition ug road right of way ug ang nahabilin nga P44.73 bilyones mao ang alang sa site development ug mga pasilidad nga panginahanglanon sa highway. Apan plano nga dugangan pa ang pundo og P8.64 bilyones alang sa equity sa mga private investors isip usa ka interest samtang nagpatukod sa maong highway. Si Bise Gobernador Agnes Magpale nipadayag sa iyang suporta sa maong proyekto ug matud niya nga dako kining tabang sa pagdani og foreign investors.

Sa pagkakaron, nakita sa kagamhanan sa Probinsiya sa Sugbo nga angayan sila nga magpahigayon og environmental assessment tungod kay kinahanglan nilang ikonsiderar ang pag-limit sa mga environmental areas nga sensitibo ug giprotektahan ilabi na sa buffer zones pinaagi sa pagbuhat og tunnels, viaducts ug embankments.

Si kanhi board member ug karon Capitol Consultant Gigi Sanchez nagkanayon nga ang maong proyekto maoy sulbad sa problema sa kahuot sa trapiko sa kadalanan sa Sugbo.

Ang nahisgutang karsada nga giplanohang tukoron diha sa bukirang bahin sa Sugbo aduna kini 300 kilometros ang gitas-on ug langkuban sa upat ka lane nga magtadlas gikan sa Lungsod sa Santander habig sa habagatan paingon ngadto sa Lungsod sa Daanbantayan habig sa amihanan. Matud ni Sanchez nga milyones ang nawagtang sa Metro Cebu tungod sa problema sa kahuot sa trapiko diha sa kadalanan matag adlaw.

Ang amahan ni Sanchez nga si kanhi Bise Gobernador Gregorio Sanchez ang niduso kaniadto sa maong proyekto.

Ang maong proyekto giplanohan nga sugdan unta kini niadto pang tuig 2008 ug mahuman niadtong 2013. (/BDB)(BANAT NEWS)