Nakainom namasol nalumos

CEBU, Philippines — Nalumos ang 60-anyos nga lalaki samtang namasol sa kadagatan sa Barangay Tindog, Lungsod sa Medellin niadtong Biyernes sa alas 4 sa hapon.

Giila sa Medellin Police Station ang namatay nga si Avelino Apa Brizo, Jr., taga Sitio Santa Cruz, Barangay Curva sa maong lungsod.

Sigun pa sa imbestigador nga si Police Officer 1 Rosano Queding nga sa inisyal nila nga impormasyon nasuta nga namasol ang lalaki uban sa iyang tulo ka higala ug iyang usa ka bayaw sa kadagatan sa maong lugar.

Giingong didto nag-inom silang Brizo ug ang iyang bayaw ug pagkahuman nangsawom sila sa dagat.

Wala magdahum si Brizo nga naabot siya sa kantil nga dapit diin gawas nga nikalit og ka lawom, kusog sab kaayo ang sulog sa tubig.

"Naglisud og salbar iyang mga kauban kay kusog kaayo ang sug mao to nga nagpatabang sila, naa may tulo ka pumpboat sa unahan," si Queding niingon.

Apan giingong dugay nahaw-as ang biktima nunot na sab sa kalubog sa dagat.

Gisuwayan pa kini og tabang sa baybayon samtang nagpaabot sa sakyanan nga modala paingon sa tambalanan apan gideklarar nga patay na pag-abot sa tambalanan.

“Sa among nakita wala may foul play," dugang pa sa maong polis. (Romeo T. Limpangog/ GMR)(BANATNEWS)