Namutol og mga kahoy nasikop

CEBU, Philippines – Nagtingkagol sa San Remigio Police Station ang duha ka lalaki kinsa giingong naaktohan sa kapolisan nga namutol og mga kahoy niadtong Huwebes sa hapon diha sa Sitio Podco, Barangay Dapdap, Lungsod sa San Remigio.

Ang nasikop mao sila si Dante Ursabia Catana, 49 ug Jefrey  Agie Simpresa, 19, mga residente sa Barangay Argawanon.

Nasakmit sa mga polis gikan kanila  ang 219.6 ka board feet nga Mahogany ug Magtalisay lumber, usa ka chainsaw, tulo ka  litro nga gasolina ug pagpahumok sa chainsaw kong moungot kini.

Si Police Chief Inspector Audie Pelayo, hepe sa kapolisan sa maong lungsod nibutyag nga alas 3:00 pasado sa hapon niadtong Huwebes ilang nasigpatan ang maong mga suspetsado nga namutol sa mga kahoy diha sa maong dapit.

Giingong ang duha wala makapakita og dokumento o permit  gikan sa Department of Environment and Natural Resources (DENR) sa pagpamutol nila sa maong mga kahoy. (/BDB)(BANAT NEWS)