Sakop sa Parojinog drug syndicate gipangita

CEBU, Philippines – Gipangita sa kapolisan sa Mandaue City Police Office ang gikataho nga walo sa 15 ka sakop sa Parojinog drug syndicate nga nia sa Central Visayas.

Si Senior Superintendent Julian Entoma, direktor sa MCPO, nipadayag  nga nakiglambigit sila sa paghipos og mga kasayuran sa intelligence division sa Police Regional Office-7.

Gibase ni Entoma ang iyang pamahayag sa nahitabo nga pagpamusil patay sa mga sakop sa security team sa Dakbayan sa Ozamis nga ubos ni Bise Mayor Nova Princess Parojinog niadtong Domingo sa gabii sa Barangay Cubacub, Dakbayan sa Mandaue.

Ang duha nga gipamusil patay sa wala pa hiilhing mamumuno nailhan pinaagi sa ilang mga voters ID nga sila si Mark Lester Castillo, 40, taga Purok 3, Baybay, San Roque, Ozamis City ug iyang kauban nga si Renan Mabida, 35.

Matud ni Entoma nga ilang nahibaw-an nga pulos taga Ozamis City ang mga biktima sa maong pagpamusil ug kanhi chief security ni Bise Mayor Parojinog.

Ang duha giingong gikatingad-an sa ilang pagpuyo sa Purok 2, Cubacub diin giingong mahalon ang mga gamit ug ilang namatikdan nga pulos kini walay trabaho ug manggawas panahon sa gabii.

Nunot niini gimando ni PRO-7 director, Chief Superintendent Debold Sinas, ngadto sa kapolisan sa MCPO ug Lapu-Lapu City Police Office, sa pagpalawom pa sa imbestigasyon labot sa maong taho sanglit ang usa sa mga namatay ang nalambigit sa pagtulis sa Robinsons Place Cebu niadtong tuig 2011. (/GMR)(BANAT NEWS)