Daluz gipasuspenso tungod sa “unexplained wealth”

CEBU, Philippines — Gikatakdang moduso og petition for certiorari ngadto sa Court of Appeals si Konsehal Jose Daluz, III isip legal remedy niini sa iyang unom ka buwan nga suspension.

Si Daluz nanghinaot nga ang korte mobali sa desisyon niini kalabot sa isyu nga “unexplained wealth” batok kaniya.

Gawas niini, ang Ombudsman usab wala pa makaresolbar sa motion for reconsideration nga giduso ni Daluz niadtong buwan sa Hulyo niining tuiga.

Ang Ombudsman niimplementar sa suspension batok kang Daluz ug ang Department of Interior and Local Government (DILG) ni-serve sa kamanduan diha sa buhatan ni Daluz kagahapon sa buntag.

Gipasabot ni Daluz ang kalit nga pagsaka sa iyahang katigayonan niadtong tuig 2007 gumikan kini sa properties nga iyang na-inherit sa iyang inahan nga nitaliwan.

Si Bise Mayor Edgardo Labella kinsa kaalyado sa konsehal masaligon nga ang CA modesisyon pabor kang Daluz.

Sa laing bahin, andam i-endorso ni Labella sa Barug Team Rama Partido Demokratiko Pilipino-Lakas ng Bayan Cebu City si Konsehal Jocelyn Pesquera kinsa nipakita og interest nga modagan isip  kongresista sa 2019 May election. Si Labella nagkanayon nga aduna siyay  pagsalig ug kompiyansa kang Pesquera isip usa ka responsable ug outspoken city legislator.

Ug isip usa ka abogada ug accountant qualified nga modagan si Pesquera isip South District Representative.

Sayo pa, si Pesquera nipadayag sa iyang intensiyon nga modagan sa kongreso sa umaabot nga 2019 elections.

Samtang sa north district usa ang ngalan sa actor nga si Richard Yap ang nitumaw nga giingong magpapili sa umaabot nga piniliay.

Si Yap nagdako dinhi sa Cebu City ug nagtungha diha sa Sacred Heart School sa elementarya ug high school ug nikuha og kursong Bachelor of Science in Medical Technology diha sa Velez College. (BANAT NEWS)