Ong mag-bise mayor ni Osmeña?
CEBU, Philippines — Gihugon-hugon nga si Association of Barangay Council (ABC) President ug Kasambagan Barangay Captain Franklyn Ong maoy kuhaon pagka-bise mayor ubos sa Bando Osmeña Pundok Kauswagan (BOPK) sa umaabot nga May 2019 elections.
Apan si Ong miingon nga mas gusto niyang tutokan ang barangay level ilabi na nga una pa niya kining termino isip ABC President. “Dili lang, I want to do more things pa for the barangays. I just want to focus as ABC president for now,” sigon ni Ong.
Niadtong Hulyo 30 si Ong napili isip ABC President nga gisuportahan sa kasamtangang adminis-trasyon. Nasurpresa siya nga ang mga tigbalita nangutana niya labot niini apan siya mipadayag nga dunay pipila ka mga barangay kapitan nga andam mopaluyo kon modagan siya pagka bise mayor. Si Konsehal Sisinio Andales sa BOPK miangkon nga wala siyay ideya kon si kinsa ang running mate ni incumbent Mayor Tomas Osmeña sa 2019 midterm elections apan ilaha kini sabotan. Ang kaalyado niini nga si Konsehal Joy Augustus Young miingon nga nag-discuss pa sila kon kinsa ang running mate ni Osmeña. Si Young maoy runningmate kaniadto ni Osmeña apan naparot ni Bise Mayor Edgardo Labella.
Samtang sa Barug Team Rama Partido Demokratiko Pilipino-Lakas ng Bayan si incumbent Vice Mayor Edgardo Labella modagan pagkamayor ug si kanhi mayor Michael Rama ang iyahang running mate. (BANAT NEWS)
- Latest
