Tulo suspek pagpatay sa Koreano nadakpan
CEBU, Philippines – Tulo ka mga suspek pagpusil patay sa usa ka Korean national sa motel sa Barangay Mabolo, Cebu City niadtong Agosto 26 ning tuiga, nadakpan sa kapolisan pinasikad sa warrant of arrest sa usa ka motel sa Barangay Apas ning siyudad.
Ang nasikop mao sila si Jessie Casado, alyas Kano, 35, taga Barangay Lamac, Consolacion ; Ajie Soquilon, 18, taga San Vicente, Liloan nga kapuyo ni Kano, ug si Arlene Soquilon, 46, inahan ni Ajie.
Nasikop si Casado, uban sa mga kuyog niini pinaagi sa hiniusa nga operation sa Consolacion Police Station pinangulohan ni Police Chief Inspector Gerard Ace Pelare ug Mabolo Police Station nga giunhan ni Police Chief Inspector Dindo Alaras.
Ang mga polis nagdala og duha ka warrant of arrest nga giisyu ni Judge Allan Francisco Garciano sa Branch 28 ug Judge Ferdie Riveral sa RTC Branch 56 tungod sa kasong murder.
Nasakmit atol sa pagkasikop sa mga dinakpan ang usa ka .45 kalibreng pistola nga adunay serial number ug lima ka bala, pito ka medium size sa gituohang shabu, usa ka ampoule sa gituohang nubain, lima ka ampoules nga wala nay sulod, ug 12 ka syringes nga adunay sulod nga nubain ug kagamitan sa pagsuyop og drugas.
Ang mga dinakpan nagtingkagol na karon sa prisohan ug gipaabot ang pagpasang-at og tukma nga kaso batok nila nga kalapasan sa RA 9165.
Si Casado usa sa mga gitumbok nga suspek pagpusil patay kang Yougho Lee diha sa usa ka motel sa Mabolo. (/IBM)(BANAT NEWS)
- Latest
