Pito ka tawo nga nasikop dunay nagpaluyo?

CEBU, Philippines — Pito ka armadong tawo nga nasikop sa kapolisan sa Dakbayan sa Talisay sa nilabay’ng semana  giingong gipaluyohan og dagkong tawo.

Si Superintendent Marlu Conag, hepe sa kapolisan sa maong dakbayan nagkanayon nga dili pa nila makompirmar ang maong taho ug padayon pa ang ilang pagsubay sa background sa matag usa sa maong mga dinakpan.

Gibutyag ni Conag nga adunay abogado nga nagkupot sa maong mga dinakpan. Ang mga nasikop gilangkuban nila ni Raychan Rodriguez, 31-anyos; Domingo Del Campo, 45; Richard Mondanto, 41; Dexter Noynay, 43; Jose Winny Coronel, 44; Fel Jun Edaño, 27 ug Arvin Castro, 40 parehong mga nagpuyo sa Villa Mariquita, Barangay Lahug, Dakbayan sa Sugbo. Ang matag usa sa suspetsado nasakmitan og kalibre .45 nga pistola gawas kang Rodriguez nga .40 calibre   ug 9mm kang Castro.

Ang mga armas nga nasakmit gikan sa mga suspetsado parehong puno sa mga buhing bala ang magazine niini.

Ang mga suspetsado nasikop diha sa Zone 1,  Sitio Mananga 1, Dakbayan sa Talisay niadtong Biyernes human si Alberto Ceniza, Jr., hingkod ang panuigon, nagpuyo sa maong lugar nangayo og tabang sa dihang nakita niya ang mga armadong lalaki.

Matud ni Conag nga adunay lisensiya ang uban sa ilang armas apan wala silay permit to carry hinungdan sa ilang pagkasikop. (BANAT NEWS)