Karaan nga Acacia natumba

CEBU, Philippines — Nakamugna og trapik kagahapon sa buntag sa Lungsod sa Sibonga ang pagkatumba sa karaan na kaayo nga punoan sa Acacia atubangan sa simbahan sa parokya ni Santa Felomina sa may national highway.

Matud ni Police Officer 2 Paulino Sanchez, desk officer sa Sibonga Police Station, nga alas 8:30 kagahapon sa buntag kalit lang naluka ang kahoy ug natumba diin usa ka 54-anyos nga ticket collector sa lungsod nga si Dennis Tanggasa ang nakaangkon og gamay nga kadaut human naigo sa mga sanga-sanga sa kahoy.

Sumala pa ni Sanchez nga gawas kang Tanggasa napiyapi sab og gamay ang motor nga naigo sa pagkatumba sa kahoy nga gituohang lata na ang ilawom nga bahin.

Dugang pa ni Sanchez nga Domingo sa gabii kusog ang uwan sa ilang lugar ug daku ang posibilidad nga nahumok ang yuta ug didto nibigay na ang mga gamut sa kahoy.

Gitug-an ni Sanchez nga wala pay udto nabalik ra dayon sa normal nga sitwasyon ang lugar human dali nga gitabangan og putol ang maong kahoy nga naluka. (BANAT NEWS)